Assam: Umrangso lungalhthei khura tangte chhanchhuah hna thawh chhunzawm zel

Assam-a Dima Hasao district-a Umrangso lungalhthei khur chhung tuiin a chim avanga hnathawktu tang mekte chhanchhuah hna chu thawh mek zel a ni.

Chhanchhuah hna hi Indian Army, Indian Navy, NDRF leh agency hrang hrang ten an thawk a ni. Khur chhunga tang mi pakua zinga mi pali ruang chu lachhuak tawhin, mi dang panga erawh an chin hriat an la ni lo.

January 8 khan Nepal mi Ganga Bahadur Shreth ruang chu lungalhthei khur chhung aṭang hian a hmasa ber atan anlo la chhuak tawh a ni. January 11 khan ruang pathum dang an lakchhuah belh leh a, chungte chu Lijen Magar (27) Umrangso a Kalamati khaw mi, Khusi Mohan Rai (57), Magergaon, Kokrajhar, Assam leh Sarat Goyary (37), Thailapara, Sonitpur, Assam te an ni.

Chhanchhuah hna thawk tur hian Coal India team, member 12 awmna chuan Zirtawpni khan Dima Hasao hi an thleng a ni.

Congress Lok Sabha MP Gaurav Gogoi chuan prime minister Narendra Modi hnenah lehkha thawnin, Dima Hasao district a lungalhthei khura chhiatna thleng chungchang chhui chiang tura Special Investigation Team (SIT) dinsak turin a ngen. A lehkhathawnah chuan January 6, 2025 a dan phalloh lungalhthei khur chhunga chhiatna thlennaah hnathawktu mi 10 vel an tan thu a sawi a, chhanchhuah hna thawh zawm zel ni mah se ruang ṭhenkhat hi an chin hriat loha an la awm thu Congress MP chuan a sawi.

Chief minister Himanta Biswa Sarma chuan FIR thehluh a nih bakah he chhiatna thlenga inhnamhnawih mi pakhat an man tawh thu a lo sawi tawh bawk.