Gogoi-a'n central fund a pangngai anga pek a phut

Assam Chief Minister Tarun Gogoi chuan central funding pattern chu a pangngai anga kalpui phutin, 90:10 kal­phung hman chhunzawm a duh thu a sawi.

Kum 2015-16 Union Budget-in Centrally-sponsored schemes hrang hrang atana sorkar laipui fund pek dan kalphung, 90:10 a titawp chu state hnufual te'n an tawrh tur thu Nilaini khan Guwahati-a press conference-ah a sawi.

"Union Budget chuan flagship programme leh Centrally-sponsored schemes hrang hrang atana sorkar laipuiin 90:10 funding pattern a hman ṭhin chu a titawp tih a chiang a, project pakhat emaw pahnih emaw velah chuan 90:10 kalphung chu hman pawh a ni mahna, mahse central fund zawng zawngah sorkar laipuiin 90% a tum a, state te'n 10% an lo tum ve ṭhin kha kan tan chuan a tawk chauh a, kan mamawh bawk a ni," tiin Gogoi chuan a sawi.

Integrated Child Development Scheme (ICDS) atana sorkar laipuiin state te hnena sum a pen dan kalphung chu 50:50 a nih tawh thu Assam Chief Minister chuan a sawi bawk.

Sorkar laipuiin 14th Finance Commission rawtna anga hmarchhak state te special category status a tihtawp chu Gogoi chuan dah chhunzawm zel a duh thu a sawi bawk a, special status chu hmasawnna kawnga hnufual zawkte'n state dangte ruala ke an pen theih nan a ṭul a ni, a ti.

14th FC ruahmanna siam chungchangah Assam chuan 50%-a fund tihpun a ngen laiin, 42% chauha a tihpun thu a sawi bawk.

Chief Minister Gogoi chuan central-a BJP sorkar chu sawisel zuiin, External Affairs Minister Sushma Swaraj-i inhnamhnawihna, Lalit Modi vanga buainaah BJP chu thil dik lo titute hum tumah a puh bawk.

"Dan bawhchhetu Lalit Modi chu Sushma Swaraj-in a ṭanpui a, BJP-in Swaraj-i a thlawp thung a, hei hi BJP-in thil dik lo titute hum a tumna tichiang tu a ni," a ti.

Hetihlai hian Assam Public Service Commission (APSC)-in regular taka combined competitive examination a buatsaih theih loh leh exam a lo buatsaih tawha thil fel lo a awm nia sawi chu Gogoi chuan chhui a nih tur thu a sawi.

APSC-a thil fel lo awm chungchangah hian Krishak Mukti Sangram Samiti (KMSS) hotu pahnih- Akhil Gogoi leh Kamal Medhi chuan Thawhṭanni aṭang khan APSC office kawtah an lungawi lohna lantirin chaw ngheia nawrh an lo huaihawt tawh a ni. Mahse APSC Principal Controller of Examination chuan office-a hnathawkte tihbuai tumah Akhil leh Medhi hi puhin an lakah thubuai a siam a, Thawhlehni khan police te'n an man nghal.

KMSS hotu Akhil-a man a nih chungchangah Chief Minister Gogoi chuan, Akhil-a leh Medhi chu office-a hnathawkte an tihbuai avanga man an ni, a ti a, man an nih chungchangah sorkarin thil a tidik lo a nih chuan court-in a chhuah thuai a rin thu leh bail a phalsak a rin thu a sawi.

Akhil-a leh Medhi hi Guwahati-a Chief Judicial Magistrate court-ah hruai an ni tawh a, court chuan bail phalsak loin, judicial custody-ah a dah nghal a ni.