Building khar zirlaite'n an tuar

Meghalaya East Khasi Hill district thuneitute chuan High Court thupek angin Thawhlehni khan Shillong-ah dan phal chin baka in sak, in chhawng sang 24 an kharsak a, heng zingah hian Islamia Secondary School a tel avangin zirlaite an buai phah hle.

School zirlaite hian Thawhṭanni aṭang khan half yearly exam an ṭan a, June 29 thleng neih tura ruahman a ni.

Meghalaya High Court hnuaia committee din chuan Shillong-a in chhawng sang 24 hi Meghalaya Urban Development Authority (MUDA) dan an bawhchhia tiin a khartir a ni.

Islamia Secondary School principal Dilip Kumar Dutta chuan exam chu an cancel a ṭul thu leh a hun an ruat ṭhat a ṭul thu a sawi a, zirlaite chu tualchhung chanchinbu leh local news channel kaltlanga a hun leh hmun hriattir an nih tur thu a sawi.

Dutta chuan school building khar a nih chungchangah court-ah petition an thehluh tawh thu sawiin, half yearly exam neihna tur chu hmun remchang zawn lailawk an tum thu a sawi.

School thuneitute hian Nilaini khan East Khasi Hill district Sub-Divisional School Education Officer an hmu tawh bawk a, ruahmanna siampui turin an ngen.