AP CM hlui Kalikho Pul thia hmuh a ni

Arunachal Pradesh-a Congress kaihhruai paihthlak a nih theih nana hma latu leh a hnu thla li chhung Chief Minister nihna chelhtu Kalikho Pul, kum 47 chu nimin zing khan thia hmuh a ni.

Pul hi nimin zing khan Chief Minister's official residence, Itanagar-ah thia hmuh a ni a, a chennain cheiṭhat a nih mek avangin he hmunah hian ala khawsa rih a ni.

Pul hi Congress MLA niin, amah leh Cong-ress MLA dang eng emaw zat chu December 2015 aṭang khan Congress party lakah an hel a, Congress kaihhruai sorkar chu rorel theiloin a awm nia sawiin, hetih laia AP Governor Padmanabha Balakrishna Acharya chuan an state-ah hian President's Rule a puang zui a ni.

President's Rule puan a nih hnu hian sorkar thar din a ni a, kumin February khan Pul hi chief minister atan lakluh a ni.

Chief minister atana ruat a nih danah hian Supreme Court chuan thil dik lo a awm tih tarlangin, AP-ah hian Congress sorkar din leh turin thupek a chhuah zui a ni. July thla khan Congress party chu House-ah thlawptu a nei ṭha tawk em tih fiah a ni a, Congress MLA hel ten an party chu thlawp lehin MLA 45 leh Independent MLA pahnih ten thlawpin Congress sorkar a ding leh ta a ni. Congress helte hian an chief minister ṭhin Nabam Tuki chu Chief Minister atan an thawp theih loh avangin Pema Khandu chu AP chief miniter pakua-na ni turin lakluh a ni ta zawk a ni.

Pul hian chief minister hna thla li chhung a chelh hman a, thla hmasa lawk khan Supreme Court thupekin a kaihhruai sorkar chu titawp a ni a, chief minister a nihna hlih zui a ni bawk. Kalikho Pul hi mahni inawkhlum nia tarlan a ni a, inawkhlum a ni ngei em tih chhui chian mek a ni. Pul hian lehkha a hnutchhiah a, chu chu police ten an zir chiang dawn bawk. Pul a thi tih hriat a nih veleh hian Pul-a thlawptu mi ṭhahnem tak chu Chief Minister Pema Khandu chenna in kawtah an pungkhawm nghal a, deputy CM Chowna Mein leh minister dangte pawh mipui pungkhawmte hian an beizui nia tarlan a ni.