Bill thar peih fel a ni ṭep tawh - Manipur Dy CM

Manipur Deputy Chief Minister Gaikhangam chuan Inner Line Permit (ILP) Bill duan thar chu zawh fel a nih ṭep thu sawiin, mipuiten Bill chung-changa rawtna an siam theih nan social net-work-ah tarlan a ni, a ti.

Deputy CM chuan Joint Action Committee (JAC) ten Anti-Tribal Bills an duh lohna chu sorkarin a hriatpui thu sawiin, an pawm theih ngei turin siam rem a ni a ti. Anti-Tribal Bill duh lohna JAC ten an lantira buaina chhuak avangin tribal mi pakua te chuan nunna an lo chan tawh a ni. Gaikhangam chuan Manipur-in hun harsa tak a hmachhawn mek tih sawiin, tlang ram leh phaia cheng mipuite duhdan chu a inpersan hle a ni, a ti. Mipuite chu sorkar hmalakna dodal zawnga khawsa lo tur leh thil dik lo a awm a nih chuan sorkarah ṭha taka hriattir zawk ṭhin tura a duh thu a sawi bawk.

Manipur Assembly chuan kum 2015 khan Bill pathum - Manipur Land Reforms and Land Revenue (7th Amend-ment) Bill 2015, the Manipur Shops and Esta-blishment (2nd Amend-ment) Bill 2015, leh the Manipur Protection of Peoples Bill 2015 te chu a lo pass tawh a, dodalna nasa tak awm mah se India President pawmpui tura thawn a ni. Mahse Bill hi Constitutional Expert ten an zir chian hnuah siam ṭhat ngai tam tak a awm vangin pawmpui an ni lo.