Manipur: MP Raut-a'n Manipur ngaihthahah Amit Shah puh

Shiv Sena (UB) MP Sanjay Raut chuan BJP hruaitu, union home minister Amit Shah chu hmarchhak biala buaina chhuahna, mi 250 laiin nunna an channa leh chenna in chhuahsan mi sang tel an awmna hmun Manipur ngaihthahah a puh.

Raut chuan Nationalist Congress Party (SP) chief Sharad Pawar nen Mumbai-a meeting an neihnaah he thu hi a sawichhuak a ni.

Meeting an neih zawh hian Raut chuan Pathiannia Amit Shah-a'n Maharashtra a tlawh ṭuma Pawar leh Shiv Sena (UBT) president Uddhav Thackaray te chungchang a sawi dan chu a sawisel zui bawk.

Raut chuan Shah-a'n inphatsan ṭhat lohna a sawi pawh chu sawiselin BJP hruaitu tam tak ten an party awmna sa phatsanin BJP an zawm thu a sawi. BJP cabinet minister 80% te leh MLA 40% te chuan BJP zawm tur hian an party awmna sa an phatsan tih a sawi. BJP Maharashtra te an inphatsan nasa hle a, mahse heti chung hian Shah chuan rinawmna thuchah a sawi tho a ni, a ti. Shah chu Beed leh Parbhani-a tualthahna thleng chungchangte ngaihven zawk turin a ngen bawk a ni.

Maharashtra inthlan-a BJP chakna chuan politics lama inphatsanna a titawp ta nia Shah-a'n a sawi chu Raut hian pawm thei loin, a hun takah an thuruk chu ala puangzar dawn tih a sawi.

Amit Shah chu ram hruaitu ni loin, BJP hruaitu a ni tiin BJP leh Shiv Sena hmuchhuaktu Balasaheb Thackeray inzawmna chu zirchiang turin a ti. Pawar chungchang sawi ringawt loin, Solapur-a Markawadi tlawh a, BJP thil tih dik tawk loh dante va hrechiang tura a duh thu a sawi bawk.