Assam: Dan phal loha thil tia puh DHAC CEM nupui bibo

Assam-a Dima Hasao Autonomous Council (DHAC) Chief Executive Member (CEM) Debolal Garlosa nupui, Kanika Hojai chu Assam-a chhiatna thlenna, Umrangso lungalhthei khur siam chungchang dan phal loha thiltihnaa a bultumtu nia puh a ni a, amah hi chin hriat lohin a bibo zui nghal a ni.

Umrangso lungalhthei khur hi tuiin a chim a, khur chhungah hian mi pakua tangin an zinga mi pali ruang chu lak chhuah an ni tawh.

Kanika Hojai hian Pathianni khan Haflong a chhuahsan a, state pawnah a biru mek nia rin a nih thu report chuan a tarlang. An chenna inah hian Pathanni aṭang khan hmuh tur a awm tawh loa, man a pumpelh theihnan a tlanchhia nia ngaih a ni.

Pathianni khan Sarmindar Karbi Apei (SKA), Karbi pawl lian ber chuan Umrangso police station-ah Kanika Hojai hi dan phal loha lungalhthei siamnaa inhnamhnawiha puhin a lakah FIR an thehlut a ni. FIR hi SKA secretary leh president ten an sign a, Kanika leh Punush Hojai te chhui chian an phut.

Halali Progressive Welfare Society (HPWS) pawhin Pathianni khan Debolal Garlosa leh Kanika Hojai te lakah complaint an thehlut tawh bawk. An pahnih hian Supreme Court leh National Green Tribunal (NGT) ten Umrangso, Dima Hasao district-a lungalhthei khur siam an khapna palzutah an puh a ni. Inrinni liam ta khan Dima Hasao Congress unit member Kome Kemprai leh Pitush Langthasa te pawhin Debolal Garlosa leh Kanika Hojai te lakah hian FIR an lo thehlut tawh bawk.

Hetih mek lai hian lungalhthei khur chhunga tangte chhanchhuah hna chu thawh chhunzawm zel a ni a, Thawhṭanni kha ni riat chhung chhanchhuah hna an thawhna a ni.