PM-in NE state-te status a ngaihsak lo : Tripura CM

Tripura Chief Minister Manik Sarkar chuan hmarchhak state pariatte tana special category status pek chhunzawm an phut chungchang chu Prime Minister Narendra Modi chuan a ngaihsak tawk lo nia a ngaih thu a sawi.

New Delhi-ah hmarchhak state-te thil phut chungchang PM sawipui turin Sarkar hi a zin a, PM Modi a kawm hnu­ah Nilaini zan khan an state lamah a kir leh a ni. Agartala a thlen hnua chanchin thar lakhawmtute a kawmnaah he thu hi a sawichhuak a ni. Sarkar chuan, 'Hmarchhak chief minister pariatten special caterogy status pek chhunzawm zel kan phut chungchangah PM hi a ṭawngchhuak duh lo a, min ngawihsan tlat a ni' a ti. Hemirual hian vawi eng emaw zat an ngen hnuah PM chuan Delhi-a North Estern Council (NEC) meeting neih leh hunah telpui a remtih thu a sawi.

Kum 17 zet Tripura CM hna lo chelh tawh Sarkar chuan, 'Sorkar laipuiin hmarchhar state-te hmasawnna tura sum min pek theih loh chuan, Washington leh Pakistan-te chu sum kan dil ngawt thei si lo a ni' a ti.

Hmarchhak biala chief minister pariatte chuan central-a BJP kaihhruai NDA sorkarin special category status tihtawpsak a tum chungchangah April 23 khan resolution siamin, special caterogy status chu pek chhunzawm zel turin an phut a ni.

Sarkar chuan, 'Special category state-te chuan NCA, SCA leh SPA hnuaiah fund ṭha tak an dawng ṭhin. Centrally sponsored scheme (CSS) ah pawh special category state-te tana funding pattern chu 90:10 niin, sorkar laipuiin senso aṭanga 90% a tum sak a, state-ten 10% an tum ve thung a ni' a ti. Mahse hei hi tihtawp a nih chuan state-te tan phurrit nasa tak a siamsak dawn a, hnathawh tur tam takte an kalpui theih dawn loh avangin hmarchhak bial hmasawnna tur scheme-te pawh tihtawp a ngaih phah dawn niin a sawi.

Sorkar laipuiin Planning Commis­sion thlakna tura a siam, NITI (National Institution for Transforming India) Aayog din a nih hnuah, 14th Finance Commission rawtna angin hmarchhak bial tana special category status pek chu tihtawp tum a nih thu Sarkar chuan a sawi.

Ramchhunga state 11-te chu special status category hnuaiah hian dah mek an ni a,hengte hi hmarchhak state pariatte bakah Himachal Pradesh, Jammu and Kashmir leh Uttarakhand-te an ni.