Nagaland-in school-ah junk food a khap

Nagaland-a Direc­torate of School Educa­tion chuan Ningani khan state chhunga school zawng zawngte hriattirna a pe a, school canteen leh a chhehvel dawrah chaw tak ni lo kamram, junk food zawrh khap turin a ti.

School education de­part­ment chuan naupangte hriselna an ngaih pawi­mawh thu an sawi a, hemi rual hian khapna an siam hian naupangten in aṭanga chaw leh ei tur ṭha tiffin-a an paite erawh a huam tel lo tih an sawi.

School Education Director, Zaveyi Nyekha chuan thuchhuah siamin, naupangte zingah thau lutuk, thisen sang leh zunthlum natna te a sang chho hle tih a sawi a, hei vang hian zirlaiten hriselna ṭha an neih theihna turin ei tur ṭha leh ei hunbi dik vawn pawimawh leh ṭul­nate sawiho leh zirtirna neih a ngaih thu a tarlang.

School hrang hrangte hnenah junk food ṭhat loh dante chu school leh a chhehvelah sign/billboard/hoarding hmanga tarlang turin a ngen bawk.

Kum 2014 khan Pun­jab sorkar chuan school compound chhunga junk food hralh a lo khap tawh a, naupangte pawh school-ah keng lo tura hriattir an ni.

Kumin March thla khan Delhi Court chuan junk food-ahte hian fat, su­gar leh salt a sang hle tih sawiin, school leh a chheh­vel meter 50 bialah khap tlat tur a ni a lo ti tawh bawk.