Manipur-ah martar-te hriatrengna hun hmang

Manipur mipuite chuan an ram chhanhimna atana nunna hlantute hriatrengna hun chu Ningani khan an hmang.

Imphal-a Kekrupat-a matar-te thlan siamah mi tam takin zahna pangpar an dah a, an zingah hian State deputy chief minister Gaikhangam, commerce and industries minister Govindas Konthoujam leh MLA Ng Bijoy-te pawh an tel.

Kum 2001, June 14 khan India sorkar leh NSCN(I-M) ten ram bithliah chin awm loa inkahhai an puan chu pawtseiin Bangkok Declaration siam a ni. Hei hi duh loin June 18 khan Imphal-ah mi­pui­ten lungawi lohna an lantir a, buaina chhuakah mi 18 in nunna an chan a ni. Hemi hnu hian India sorkar chuan an inremna siama ram bithliah chin awm lo tia ziah chu a titawp a ni. Inremna siam dan duh loha lungawi lohna lantir a nih ṭum khan sorkar building tam tak hal an ni a, heng zingah hian state legislative assembly, MLA official residence leh political party office-te an tel.

All Manipur United Clubs Organistation (AMUCO) leh United Committee (UCM) chuan Manipur ram humhalhna tura nunna chante hriatrengna atan June 18 hi Great June Uprising Unity Day atan an hmang zui ta a ni.

AMUCO leh UCM hruaitute chuan Manipur mipuite chu sorkar laipui leh NSCN(I-M) ten inremna kawng zawnga inbiakna an neih dan leh hma an sawn dante ngaihven reng turin an chah. Manipur sorkar chu Dzuko valley-a ramri buaina awm mek pawh chingfel tura hma la thuai turin an phut bawk.