NEHU-ah ASEAN study centre hawng
Association of Southeast Asian Nations (ASEAN) study centre chu Thawhṭanni khan North Eastern Hill University (NEHU)-ah hawn a ni ta.
He study centre hi NEHU-a Indian Council of Social Science and Research (ICSSR) Centre chuan a enkawl dawn a, ASEAN-India research project leh kawng dangah te a ṭangkai hle tura ngaih a ni. ASEAN study centre hawng tur hian Minister of State for External Affairs VK Singh beisei ni mah se a remchan zawkna avangin Secretary (East) of the Ministry of External Affairs, Preeti Saran chuan a hawng a ni. He hun hi Philippines, Vietnam, Thailand, Cambodia, Indonesia, Philippines, Laos leh Singapore palaiten an hmanpui. Prime Minister Narendra Modi chuan ASEAN study centre hawn a nih tur thu hi 13th ASEAN-India summit, Kuala Lumpur-a November 2015-a hman a nih khan a lo sawi chhuak tawh a ni.
Preeti Saran chuan ASEAN study centre hawn a ni thei ta chu lawmawm a tih thu sawiin, rilru leh taksa thlenga India leh ASEAN ram ten inzawmna ṭha zawk an neih theih a beisei thu a sawi. Tunah hian India-Myanmar-Thailand Trilateral Highway - Laos, Cambodia leh Vietnam te thlun zawm turin hma lak mek a nih thu sawiin, Myanmar-a Sittwe-ah Special Economic Zone din tura hmalak mek a ni, a ti bawk.
ICSSR Deputy Director leh he study centre-a member secretary ni bawk CJ Thomas chuan he hmuna scholar te chuan ramri kaltlanga insumdawn tawnna te, bungrua inthawn tawn leh venhimna lam kalpui dan te chiang zawkin an hre thei tawh dawn a ni, a ti. Centre-ah hian conference hall leh lecture room te a awm hrang a, scholar te chu theme hrang hrang thlang chhuakin project siam sak an ni dawn tih a sawi. Heng bakah hian documentation centre a awm bawk a, ASEAN ram 10 te literature leh culture te zirna tur a ni ang.
ASEAN centre hian hmarchhak state University zawng zawng a huam dawn a, scholar lar leh academician te tan a ṭangkai hle tura ngaih a ni. Kum thum chhung atan project siam a ni dawn a, a kum khatnaah hian cross-border trade thlur bing a ni ang a, a kum hnihnah security leh a kum thumnaah ASEAN-India relationship te a ni dawn a ni. Faculty member-ah hian ASEAN ram 10 a mite an tel dawn a ni.