Helten ṭanpuina an dawng em tih sorkarin a hriatpui lo : Rajnath Singh

Union Home Minister Rajnath Singh chuan Thawhlehni khan hmarchhak ramri ralthuam tawlhrukna hmunpui anga sawi a nih thu Lok Sabha-ah a sawi chhuak a, ṭhenawm ram ten hel pawl ṭhenkhat an ṭanpui ṭhin anga sawi chungchangah sorkar laipuiin hriattirna a dawn loh thu a sawi.

Lok Sabha-a Question Hour-ah hian hmarchhak ramriah hel leh ralthuam hmanga sumdawng ṭhinte chetna a hluar hle nia sawi chu Union Home Minister chuan chhangin, Indian insurgent groups (IIGs) te hian camp, shelter house leh training centre te ramri hmun ṭhenkahtah an nei ngei tih sawiin, an zingah hian National Socialists Council of Nagaland (Khaplang) te chu thiltithei tak an nih thu a sawi. Hemi chungchang hi Minister of State for Home Affairs Hansraj Gangaram Ahir pawhin sawiin, sorkar laipui chuan ṭhneawm ramten hmarchhak hel pawl ṭhenkhat an ṭanpui ṭhin anga sawi chu sorkar laipui chuan hriattirna mumal tak a la dawn loh thu sawiin, hmarchhak ramriah hian helte chetna a hluar hle tih erawh hriat a nih thu a sawi. Sorkar laipui chuan engtiangin nge hma a lak dawn tih chu ngaihtuah tham tak a ni a ti a, heng lai ramria hel khawsa te hi
ṭhenawm ram Banghladesh leh Myanmar te chuan an thlawp niin a sawi bawk.

Ahir chuan kum 2015 chhung khan Bangladesha helte pawikhawihna avangin civil mi eng emaw zatin nunna an chan a, kuminah an khawpui Dhaka-ah helte pawikhawihna rapthlak tak an thlen leh thu a sawi. Heng thil thleng avang hian Bangladesh sorkar chuan a ram chhunga hel camp awm eng emaw zat chu a tichhe mek a, helte do let turin beihpui a thlak chho mek a ni, a ti. India leh Bangladesh inri-na bawr vela hel khawsa te nen hian sorkar chu remna zawnga inbiakna nei turin a inhawng reng a ni, a ti.

Hetih lai hian Trinamool Congress MP Kalyan Banerjee chuan sorkar laipuiin hmarchhak huam chhunga hel pawl hrang hrangte nuai chimih an nih theih nana Operation All Clear and Operation Golden Bird a kalpui chu a hlawhtling em, a hlawhtling lo a nih chuan enge a chhan tih zawhna a siam a ni. Hemi chungchang hi Meghalaya MP Conrad Sangma chuan sawi bawkin, Indo-Bangladesh border chu ngaih pawimawh a ṭul hle a ni a ti a, helte dap chhuaka an chetna titawp tur chuan India leh Bangladesh te chu ṭangkawpin joint operation neih ni thei se a duh thu a sawi. Hetianga beihpui thlak a nih chuan hel camp te chu nuai bo a har loh tur thu a sawi bawk.