NEC hi regional planning body-a leh tumna awm lo : Jaitley

Union Finance Minister Arun Jaitely chuan North Eastern Council (NEC), regional plan-ning body-a let turin sorkar chuan hmalakna a neih loh thu Thawhlehni khan Rajya Sabha-ah a sawi chhuak.

Question hour-ah Congress member Bhubaneswar Kalita chuan NEC chu regional planning body-ah leh tumna a awm em tih zawhna a siam a ni. NEC chuan Planning Commission aṭanga direct-a fund a hmuh chuan hmarchhak state te chuan sum leh paiah harsatna an tawk thei nia sawi a ni. Zawhna chhangtu, Finance Minister Arun Jaitely chuan, “Sorkar laipui chuan NEC chu regional planning body-a let turin ngaihtuahna a seng lo a ni" a ti.

Assam Congress member Ripun Bora pawhin sorkar laipuiin hmarchhak state pariat leh Himalayan state pathum tana 'special category status' a pek chungchangah zawhna siamin, tihtawp anga sawi chu thudik a ni em tih a zawt. Minister of State for Finance Arjun Ram Meghwal chuan, hmarchhak state leh Himalayan state-te chu 'special category status' pek an la ni reng a, 14th Finance Commission hnuaiah funding pattern chu 90:10 a ni a, state dang zawngah chuan 60:40 a nih thu a sawi. Hetih lai hian hmarchhak leh Himalayan state tan scheme hrang hrangah funding pattern chu 80:20 a ni tawh tih a sawi. Ram Meghwal chuan 14th Finance Commission hnuaiah fund tihpun a nih thu sawiin, 32% aṭangin 42%-ah tihsan a ni, a ti. Hemi a nih vang hian kum 2014-15 chhunga hmarchhak tana sorkar laipuiin fund a pek chu vaibelchhe 3,37,808 a ni a, hei hi kum 2015-16 ah chuan vaibelchhe 5,23,958-ah sang chhoin, vaibelchhe 1,86,150-in tihpun a nih thu a tarlang bawk.