Sikkim : Governor-in Jorethang Maghey Mela Utsav hawng

Sikkim governor Om Prakash Mathur chuan Sikkim cultural leh economic landscape tana kum 10 chhung hmun pawimawh tak luahtu, Jorethang Maghey Mela Utsav chu Thawhlehni khan a hawng.

Governor Mathur chuan festival an lawm dan chu fakin, "State hrang hranga hna a thawh tawhnaah, Sikkim-a ka thil hmuhte chu thil chhinchhiah tlak tak a ni. Chief minister Prem Singh Tamang chu Sikkim-a inlungrualna leh hmasawnna a kalpui dan te pawh fakin lawmthu pawh ka hrilh duh a ni," a ti. An programme chuan culture, sport, sumdawnna, ṭhalai hna nei lo leh mipui vatlang zawng zawng a huam a, hetiang festival huap zau leh nghawng nei ṭha hi a la hriat ngai loh thu a sawi bawk.

Mela-a tualchhung tharchhuah serthlum an phochhuah te pawh fakin, economy lama an intodelhna ti langtu a ni, tiin Governor chuan a sawi. Sikkim agricultural heritage hausakna mai bakah sumdawngmi te tan hamṭhatna a siamsak a ni a ti a, Sikkim chu hmarchhak biala serthlum thar chhuahna hmunpui a nih theih thu a sawi.

Governor chuan hmasawnna atana ṭangkai em em inlungrualna pawh he festival-ah hian tih lan a ni a, inlungrualna chu hnam ṭhanlenna leh thil ṭha lo thleng tur laka invenna pawimawh tak a nih thu a sawi. Remna leh muanna in hma a sawn zel tih a hmuhin a lawm thu a sawi bawk.

Jorethang Maghey Mela Utsav hi tualchhung mi kut themthiam, entrepreneur leh cultural performer-te tan inpho chhuahna hun ṭha tak a ni.

Governor Mathur chuan Anganwadi hnathawktute hnenah pawh fuihna thu a chah bawk a, an hna dah nghehna order pawh a sem chhuak bawk a ni. Sikkim mipuite leh chief minister Prem Singh Tamang te state tana hna an thawhna leh an inpeknaah lawmthu a hrilh bawk. "He programme hi Sikkim inlungrualna leh hmasawnna tilang chiangtu a ni," a ti.