Meghalaya: Dan phal loh lungalhthei khur siam chhuizui dawn

Meghalaya-a dan phal loha lungalhthei khur siam leh phurh chhuah a nih dan chu member pakhat, Justice (retired) BP Katakey awmna committee chuan a chhui zui dawn.

Committee hian petition tam tak a dawng tawh a, pakhat hi social activist Mingram T Sangma thehluh niin, South Garo Hills leh West Garo Hills district-ah te dan phal loha lungalhthei khur siam a awm niin a tarlang.

Justice Katakey chuan a kaihhnawih department te chu chhuizuina nei turin a ti a,an thil hmuhchhuahte pawh theh lut turin a ti bawk. Committee chuan sorkar phal loh thil tihna hmunte hi tlawh a finfiah a tum.

Dan phal loha lungalhthei khur siamte hi Goreng, West Khasi Hills hnuai leh South Garo Hills ah te a awm nia sawi a ni a, heng lungalhthei hi invoice lem hmangin Bangladesh-ah thawn chhuah ṭhin nia sawi a ni bawk.

Committee chuan a thil hmuhchhuah aṭangin tun thla tawp lam hian meeting buatsaihin hremna pek dan tur thutlukna pawh a siam nghal dawn a ni. Meghalaya High Court-in a ruat, Justice Katakey hi kum 2022-a dan loa lungalhthei khur siam chungchanga suo motu case siam chhui chhuak tur hian ruat a ni.