Red Cross ten Sharmila-i chenna pek tiam

Manipur 'Iron Lady' Irom Sharmila Chanu chuan kum 16 chhung zet chaw a nghei hnuah Thawhlehni khan a chawnghei a titawp ta a, sawi zui a hlawh hle.

Irom Sharmila hian dotu a ngah hle a, chaw nghei a tihtawp avangin a lam-ṭang mi tam tak chuan an dem bawk. Hetih lai hian Indian Red Cross Society chuan hawnna neilo anga an sawi Sharmila chu a chenna tur an ngaihtuah sak tur thu an puang. Red Cross Society Manipur branch chuan Imphal-ah a chen lailawkna tur chu an ngaihtuah sak dawn tih an sawi a ni.

Sharmila hian an inah haw a tum loh thu sawiin, AFSPA hlih a nih theih nana a beihnaah hnehna a chan hma loh chuan a nu hmu tura in lam pan a tum lo tih a sawi. Sharmila nu hi kum 84 mi a ni tawh a, chaw nghei a tihtawp nia pungkhawm zingah pawh a nu hi a tel theilo a ni. Indian Red Cross Society honorary secretary Dr Y Mohan Singh chuan, "News-a ka hmuh khan Sharmila dinhmun chu a ṭha lo hle tih ka hria a, khawi hmunah mah kalsawn thei a nilo" a ti.

Sharmila hian chaw a ei nghal lo a, khawizu pek phawt a ni. Doctor te chuan kar khat chhung vel chu thil tuiril lam a mamawh tur thu an sawi. Sharmila hi khawizu a ei lai hian a mittui a tla hial a ni. Sharmila chuan Chief Minister nih a duh thu sawiin, Armed Forces (Special Powers) Act (AFSPA) hlih a nih theih nan kawng dang a dap dawn tih a sawi. Sharmila chuan, mihring ve tho a nih thu sawiin, mi tam takin chawnghei a chawlhsan avanga an bei chu mak a tih loh thu a sawi a, politics hmangin eirukna titawp turin a beih tur thu a sawi. Iron Lady chuan, "Society siam ṭha turin ka bei dawn a, mipuite chu min thlawp turin ka ngen a ni" tiin a sawi.

Police te chuan Sharmila hi JN Institute of Medical Sciences, Imphal-ah an hruai let leh nia tarlan a ni. Hospital thuneitute chuan, chaw pangngai a ei leh theihna turin hma an la mek a, tunah chuan chaw tuiril, thlai, Horlick leh bawnghnute te pek a nih thu an sawi. Mahse rilru leh taksa lamah harsatna a nei lo niin an sawi bawk. Nimin khan Imphal court chuan Sharmila hi bail-a chhuah a phal sak a, mahse August 23-ah court-ah inlan leh tura tih a nih avangin hemi hma zawng chu judicial custody-ah a la awm ang. Irom Sharmila hian nimin vek khan press conference a nei nghal a ni.