September 2-ah Manipur House session

Manipur Assembly Session chu September 2 aṭang khian ṭan a nih tur thu Thawhlehni-a Cabinet meeting, Secretariat-a neihah tihchian a ni.

Sorkar thupuangtu Moirangthem Okendro chuan cabinet meeting-ah hian 'Protection of Manipur People Bill 2015' thlakna turin Inner Line Permit (ILP Bill) thar ‘Manipur Regulation of Non-Local People Bill 2016’ duan a nih thu sawiin, Assembly-ah ngaihtuah a nih tur thu a sawi. Bill duan thar chu state sorkar official website-ah mipui hmuh theih tura tarlan a nih thu sawiin, mipuite chuan he Bill chungchanga an ngaihdan leh rawtna te an thlen thei a ni, a ti. Bill chungchanga mipuite rawtna chu August 24 thleng sorkarin a dawn theih thu Okendro chuan a sawi bawk.

“Manipur Regulation of Non-Local People Bill-2016” ah hian base year-ah 1972 hman a ni ang. Cabinet meeting kaihruaitu Chief Minister O. Ibobi Singh chuan “local people” tih chu India khua leh tui, January 21, 1972-a Manipur state puitlinga hlankai an niha chengte leh an thlah kal zel, Manipur-a chengte an nih thu a sawi. “Non-local people” chu India khua leh tui nihna nei, mahse “local people”-in a huam si loh te an ni, a ti bawk. He Bill hi dan (Act) a nih a, hman a nih hunah chuan 'non-local people' te chu registration authority, Director of Registration of Non-local People and Tenants-ah an inziah luh a ngai tawh dawn a ni.

Cabinet meeting chuan Manipur Technical University Bill 2016 chu Assembly session lo awm turah hian pharh turin a ti bawk.