Assam Rifle 33rd battalion-in chawimawina dawng

Assam Rifle 33rd battalion chuan Manipur-a Cyclone Remal in tuilian a thlen ṭuma chhanchhuah leh chhawmdawl hna an thawh ṭhat avangin chawimawina ngaihhlut tak, World Congress on Disaster Management- Disaster Risk Reduction (WCDM-DRR) Award 2024 a dawng.

Award semna inkhawm hi Constitution Club of India, New Delhi ah neih niin mi pawimawh tak takte an tel a ni. Chawimawina hi Colonel Radha Krishna, 33rd Assam Rifle Commandant hnenah Shri Piyush Goyal, union minister of commerce and industry chuan a hlan a ni.

Manipur-ah hian kum 2024 May, June leh July khan tuilian vangin mi sang telin an chenna in an chhuahsan a, nunna chan leh bungrua tihchhiat tam tak a awm bawk. He chhiatna thlengah hian 33rd Assam Rifle chuan chhanchhuah hna an thawh bakah chenna in chhuahsan te an ṭanpui bawk. Chhanchhuah hna thawhna,'Operation JAL RAHAT-I' kalpuiin battalion hian May thla khan mi 2,065 an chhanchhuak a, medical clinic an buatsaih bawk. Operation JAL RAHAT-II pawh July-ah neih chhunzawm niin mi 1,380 an chhanchhuah belh leh a, awmna hmun tur te an buatsaih sak bawk. Chhiatna thleng avanga hliam tuar na zual mi 21 te chu Raj Medicity hospital-ah dahin Nagampal-ah feet 13-a thuka tang kum 73 mi pawh an chhanchhuak bawk.