Manipur : Arambai Tenggol-in NRC hman leh Myanmar ramri hung an phut

Manipur-a Kuki organisation leh Ministry of Home Affairs ((MHA) official-ten New Delhi-a inbiakna nei tura an inbuatsaih mek laiin, Meitei kalfawr pawl Arambai Tenggol chuan governor Ajya Kumar Bhalla chu National Register of Citizens (NRC) hmang tur leh Myanmar ramri hung a nih theihna tura hma la turin an nawr a ni.

Arambai Tenggol hian Manipur MLA-te chu an state NRC hman a nih theihna tura petition thehlut vek turin an lo nawr tawh bawk.

Thuchhuah an siamah, "Ramri hungna ṭha zawk siam a nih ngei theihna turin theihtawp kan chhuah dawn a ni. Hei hi dan loa kan chenna hmuna rawn lutte laka invenna leh, khawchhung mite himna tur a ni. Kan Governor thar pawhin hei hi a ngaih pawimawh hmasak kan ring a, theihtawp a chhuah kan duh a ni," an ti.

Kum 2022-a din, Arambai Tenggol hi Meitei culture leh identivy venhim tumtu niin, mahse kum 2023-a hnam leh hnam inkara buaina a chhuah khan ralthuam nen an che zui a ni. An pawlah hian member 50,000 vel awmin, Meitei tamna distict-ah Kuki hnamte chu ralthuam nena beiin, ṭhenkhat an ru bo bawk. An member ṭhenkhat chu dan loa mi pawisa chhuhsak tuma vaua puhin man an ni bawk a ni.

Manipur-a NRC hman a ṭulzia sawiin, hei hi dan loa pem lutte dap chhuahna tur a ni, an ti. Hei bakah Governor chu ruihhlo tawlhru ṭhinte lakah na taka hma la turin an phut bawk.