Tripura HC-in private tuition pek a khap Tripura zirlaite'n kawng an zawh

Tripura High Court-in tun­hnaia private tuition pek leh lak a khap avanga lungawi lohna lan­tirin zirlaite chuan kar kalta Inrinni khan Agartala-ah kawng an zawh.

Zirlaite hian private tuition pek leh lak chu dan hmanga pawmpui an phut bawk.

High Court thuchhuak avang­a lungawi lo, high school zirlai leh private tuition petu, zirtirtute chuan tunhnai khan meeting an nei a, lungawi lohna lantira nawrh huaihawt an rel a ni. Zirlaite hi zir­tirtute'n an fuihpawrha ngaih a ni.

Sorkar leh mimal school-a zir­tirtute'n private tuition an pek chungchangah June 11 khan Tri­pura HC chuan suo-motu public interest litigation (PIL) a siam a, private tuition pe ṭhin zirtirtute chu Right of Children to Free and Compulsory Education Act 2009 palzutah a puh. He dana Section 28 chuan zirtirtute chu private tuition emaw private tea­ching activity-ah emaw an inhnamhnawih tur a ni lo, a ti.

Court chuan sorkar leh mi­mal zirna-ina zirtirtu zingah private tuition hawng an tam hle a, dan an bawhchhiat bakah zirlaite hnen aṭangin fee tam tak an laksak a ni, a ti.

Tripura High Court chuan private tuition titawp tura state sorkar hnena a hriattirnaah, sorkar school zirtirtu te chenna, government colony-ah chuan zirtirtute hian ‘teaching shop’ an hawn thu tarlangin, sorkar chu hma la duh loah a puh bawk.

HC chuan thuchhuah a siam­ah a thuchhuak chu khing duh an awm chuan July 31 hmaa affi­davit thehlut turin a hriattir nghal.

Hetihlai hian zirlaite guardian forum-a convenor, Mritunjoy Deb chuan private tuition chu tihtawp theih a nih loh thu tarlangin, Right of Children to Free and Compulsory Education Act 2009 zawk chu siamṭhat ngaia a hriat thu a sawi.

"Secondary leh higher secon­dary level-a zirlaite chuan inelna sang tak an hmachhawn mek a, coa­ching an kal lo a nih chuan hlawh­tlin a harsa a ni," tiin a sawi.

Deb chuan sorkar school-a zirtirtu tam zawk chuan academic session ṭan tirah private tuition an hawn chu an tihtawp tawh thu sawi telin, hei hi zirlaite'n an tuar zawk a ni, a ti.

"Zirlaite chuan engineering, medical, management leh law entrance exam paltlang turin coaching an mamawh a, zirtirtute'n private coaching an tihtawp hnuah school-a zirtirna a ṭhat phah chuang si lo. Hei hi zirlaite'n an tuar a ni. Tuna kan kalphungah chuan school-a zirtirna ringawt chu a tawk lo a ni," a ti.

Tripura Education Minister Tapan Chakraborty chuan private tuition chu state sorkarin kum 2011 aṭangin a khap tawh thu sawiin, zirtirtu ṭhenkhatin an zawm loh thu a sawi a, mahse tunhnaiah High Court-in thu chhuah a siam leh tak avangin private tuition tihtawp nan theihtawp chhuaha hma lak a tum thu a sawi.