CBI-in Manipur MLA lakah charge sheet thehlut
Central Bureau of Investigation (CBI) chuan, Manipur University international guest house-a furniture item supply kaihhnawihah rorellai BJP MLA Lourembam Rameshwor leh mi dang pali lakah charge sheet a thehlut.
Charge sheet hi Imphal West-a Court of Special Judge Prevention of Corruption Act-ah thehluh a ni a, October 12-ah an panga hian court-ah inlan tura hriattir nghal a ni. Kum 2012-2016 chhunga University guest house-a furniture supply tur atana M/s Lourembam Enterprises neitu, tuna MLA ni ta L Rameshwor hnena contract pek a nih chungchangah university official-te chuan an thuneihna an hmang sual nia puh an ni. Tender tihchhuah dan pawh a dik tawk lo hle nia sawi a ni.
CBI chuan an charge sheet-ah hian hemi chungchang an chhui chiannaah, official leh contractor hi Manipur University bum turin an inlungrual niin a tarlang a, he thil avang hian university chuan kum 2012-2016 chhung khan cheng nuai 76 chuang a hloh a ni, a ti. M/S Lourembam Enterprises chuan furniture item hrang hrangte chu supply si loin bill a la a, stock register-ah supply angin ziah a ni thung niin an tarlang. He thil dik lo thupna atan hian kum 2016 October thla khan University recreation hall-ah kangmei tichhuakin, furniture te hi a kangral niin an sawi a ni, a ti.