India-Bangladesh rel project 2017-ah peihfel dawn

NITI Aayog chuan India leh Bangladesh inkara rel kawng project chu kum 2017-a peihfel hman a nih tur thu a tarlang.

Tripura khawpui, Agartala leh Bangladesh, Akhaura inkara rel kawng kilometre 15-a thui siam tur chung­changah NITI Aayog chuan advisor Dr Manoj Singh kaihhruaina hnuaiah June 18 khan New Delhi-ah meeting a ko a, Ministry of External Affairs (MEA), DoNER, Railway Ministry leh Tripura sorkar aiawhte an tel.

Meeting chuan rel kawng chu kum 2017-a hawn tura peihfel hman a nih tur thu a tarlang a, mahse hna ṭan hun tur erawh a tarlang lo.

India lama rel kawng siam tur hi kilometre 5-a thui a ni a, heng zinga kilometre 2.5-a thuiah lei lama rel kawng siam theih a nih loh vangin lei dawh tur a ni. Kilometre 5-a thui rel kawng siamna atan hian mimal ram lei nan cheng vaibelchhe 302 vel mamawh a ni.

NITI Aayog chuan rel kawng project atan hian Railway Ministry-in fund a pekchhuah tur thu a tarlang a, Railway Ministry team chu project kalpuina tur a hmunah enfiah turin a ruat bawk.