Manipur-ah hri kai hmuh chhuah tam ber ni thleng
Manipur-ah Thawhlehni khan Covid-19 kai hmuh chhuah mi 270 awmin, an state-a hri kai hmuh chhuah tam ber ni a thleng. Hemi ni vek hian hri vangin mi pakhat a thih belh leh tawh.
Hri kai hmuh tawh hi mi 9,280 an tling tawh a, an zinga mi 6,887 chu enkawl dam an ni tawh a, recovery rate hi 74.21% a ni. Mi 60 in an thihpui tawh thung.
Thawhlehnia hri kai hmuh thar zingah hian hmun danga zin chhuahna nei lo, tualchhung aṭanga kai mi 205 an tel a ni.
Assam-a hri vanga thi zat report dik loah puh
Assam Congress MP Pradyut Bordoloi chuan Lok Sabha-a Covid-19 chungchang sawihonaah, Assam-a hripui thihpui, fatality rate a hniam viauna chhan chu he hri vanga thi eng emaw zat chhiar tel an nih loh vang niin a sawi.
State minister hlui, Bordoloi chuan laboratory-ten Covid-19 an kai ngei tih an finfiah leh he hri vanga thi, mi 550 vel chu death audit board chuan natna dang an neih lawk avangin Covid-19 vanga thi zingah a chhiar tel lo a ni, a ti. Hei vang hian fatality rate hi 0.35% anga tarlan a ni a, hei hi lawmawm viaua an ngaih laiin thu dik an hriat hnuah hri vanga thi eng emaw zat chu chhiar tel an lo ni lo, a ti.
Assam-ah hian nimin thleng khan hri kai hmuh chhuah hi mi 1,61,393 an tling tawh a, an zinga 1,30,947 chu enkawl dam ni tawhin, mi 586 in an thihpui tawh a ni.