Assam: Scheme hrang hrang atan Rs vbc 2,000 pawm

Assam chief minister Himanta Biswa Sarma chuan January 16 khan state cabinet-in scheme hrang hranga hman tur Rs vbc 2,000 a pawm thu a sawi. Scheme kalpui tur zingah hian Mukhya Mantri Mahila Udyamita Asoni (MMMUA) leh Chief Minister’s Atmanirbhar Asoni te pawh an tel.

Cabinet meeting an neih zawh hnuah Chief Minister Himanta chuan an thutluka siam hi puangin, Self-Help Group community-a hmeichhia, nuai 27 te hamṭhatna leh chawikanna tur an buatsaih thu a sawi. He scheme hmang hian self-help group member, hmeichhiate tan phase hmasa berah Rs 10,000 pek an ni dawn a, phase pahnihnaah bank kaltlangin Rs 25,000 leh sorkar puihna siamsak an ni ang a, phase thumnaah hian bank kaltlang bawkin Rs 50,000 an ruahman sak thu a sawi. MMMUA kalpui dan tura kaihhruaina pawh pawm pawm vek tawh a ni, a ti.

Bodoland Territorial Region (BTR) tih hmasawn hna tluang taka thawh chhunzawm zel a nih theihna turin, cabinet chuan Bodoland Territorial Council (BTC) hnenah a project thawhna tur atan SOPD-G gund Rs vbc 401.50 pek chhuah a remti bawk.

Morigoan-a development project hrang hrang pawh pawmin, cabinet chuan Bhuragaon kaltlanga Balimukh leh Sildubi inkalpawhna kawngpui siamna atan Rs vbc 70 dah a remti a, Marigaon khuaa a tui luankawr siam nan Rs vbc 55 dah an remti bawk a ni.

Tun hnai khan Assam sorkar hian State Bank Of India (SBI) bakah Scheduled commercial banks (SCBs) te chu state sorkar hnuaia hnathawk nghet, nuai li aia tamte tana zero-premium insurance siam turin Memorandum of Understanding (MoU) a lo ziahpui tawh bawk.