Tripura: CM Manik Saha-a'n police te fak

Tripura chief minister Manik Saha chuan Ningani khan state police-te chu dan leh thupek kenkawh kawnga hna an thawh ṭhat avangin a fak. A bik takin kum kaltaa inthlanna liantham, Parliamentary leh Panchayat ah pawh buaina a awm loh thu a sawi.

Police Week-2025, Arundhatinagar Police Line, Agartala-a neih-ah Chief Minister Saha chu khuallian niin hun hmanpui a ni. State chhunga pawikhawihna tih tlem leh remna leh muanna awm theihna tur kawngah hma nasa taka lak a nih thu a sawi a, National Crime Records Bureau (NCRB) data sawilangin, 19.3 % in kum kalta khan pawikhawihna thleng a tlakhniam thu a sawi. Tripura chu ramchhunga pawikhawihna tlem lamah pathumna a nih thu leh, a hmain panga-na an nih ṭhin thu a sawi bawk.

NCRB data-a a lan danin, Tripura-a hmeichhe lama pawikhawihna chu 55% in a tlahniam a, mimal inbeihna 38%-a a tlakhniam bakah mipui vantlang intihbuaina 75% in a tlahniam a, 2024 khan a vaia chhutin 37% in a tlahniam bawk a ni.

Ruihhlo do kawnga hma an lakna pawh sawi langin, Saha chuan kum thum kalta chhung khan Narcotic Drugs and Psychotropic Substances Act hnuaiah thubuai 1,666 ziah luh a ni a, mi 2,697 man an ni tih a sawi. Nikum chhungin ganja kung vbch 1.64 tih chhiat a ni a, kum 2023 aiin ganja kung tih chhiat hi 133% in a tam zawk a ni, a ti.