Manipur Governor-in Amit Shah hmu

Manipur governor Ajay Kumar Bhalla chuan Inrinni liam ta, January 18 khan union home minister Amit Shah chu New Delhi-ah a hmu a, Manipur tualchhung buaina chungchang an sawidun a ni.

Bhalla hian Manipur Governor a nih hnua Home Minister a hmuh vawi khatna a ni.

Thla hmasaa Manipur Governor atana lak luh a nih hnuah Bhalla hian tualchhung mipuite nen inbiakna hunte neiin, state chhunga buaina chhuak mek tih reh dan tur leh, nunphung pangngaia an leh theih dan turte an sawi ho.

Hei bakah hian dan leh thupek kenkawh a nih dante zirchiangin, security force ten state chhung venhim hna an kalpui dan turah pawh ruahmanna a neih phah bawk a ni.

Bhalla hi union home secretary hlui niin Shah tan kum nga chhung, August 2024 thleng khan a lo thawk tawh. Home minister ngeiin a thlan a ni a, state-in nunphung pangngai an neih leh theihna turin amahah beiseina sang tak an nei bawk.

Manipur-ah hian May 2023 aṭanga hnam leh hnam inkara buaina chhuah aṭangin mi 260 chuangin nunna an chan tawh a, mi sang telin an chenna in an chhuahsan tawh bawk a ni.