Assam: Lungalhthei khura chhiatna thleng kaihhnawihah mi 5 man

Assam police-te chuan Dima Hasoa district-a Umrangso lungalhthei khura chhiatna thleng kaihhnawihah mi panga an man.

An mi mante hi Haflong police station-ah Zirtawpni khan hruai an ni a, mahse police tehian chhuizuina an kalpui mek avangin an hming tarlan an la remti lo thung. Lungalhthei khur chhunga hnathawktu thi chungchangah report kim loh an awm avangin heng mite hi man an ni.

Umrangso-a lungalhthei khur chhungah hian mitthi awm belh zel mah se report a ni lo a, hei hi lungalhthei khur neituten mitthi chhungte zangnadawmna pek pumpelh an duh vanga ngaih a ni bawk.

December 2023 khan Dima Hasao lungalhthei khur chhungah hian hnathawk pahnih lutin, pakhat zawk hi lung chimin a delh hlum a, a ruang lakchhuah ni mah se police hnenah report a lo ni tawh lo bawk. Lungalhthei khur neitu hian mitthi chhungte hnenah Rs nuai 1.5 leh Rs nuai 2 zangnadawmna pe turin an phut nia sawi a ni.

Helai quarry huamchhungah hian kum 2023 tho khan chhiatna lo thleng tawhin, hnathawktu pakhat a lo thi tawh bawk a ni. Lungalhthei khur-a hnathawk thite hi police ten chhuizuiin, chhiatna thleng vanga nunna chan leh mimal inhnamhnawih an manchhuah belh zel tura beisei a ni bawk.

Hetih mek lai hian Pathianni khan police leh district administration official-te chuan dan phal loha siam Umrangso lungalhthei khur chhuizuina nei turin hma an la mek.Official thuchhuah chuan dan phal loha lungalhthei khur siam hi pathum vel an kharsak tawh nia tarlan a ni.