Nagaland-ah college pathum din dawn

Union Minister of Agriculture and Farmers Welfare, Radha Mohan Singh chuan kum nga chhungin sorkar laipui chuan Nagaland-ah horticulture, forestry leh fishery College te din turin ruahmanna a siam tih a sawi.

Chief minister, T.R Zeliang chuan hemi chungchang hi thuthar thehdarhtute hmaah sawiin, Radha Mohan nen August 7 khan Chumukedima-ah an ti ti dun a, minister chuan Nagaland-ah Central Agricultural University (CAU) din a nih tur thu pawh a hrilh niin a sawi. Zeliang chuan, "Nagaland University leh Naga Hoho te chuan CAU din a nih theih nana hma la tura state sorkarah ngenna an thlen a, a hlawhtlinna chu kan hmu thuai dawn a ni" a ti. CM chuan CAU din a nih hmain forestry, horticulture leh fishery college te din phawt tura hmalak a ni ang, a ti. Zeliang chuan Union minister chuan Mithun project atan vaibelchhe 2.15 ruahman sak an nih tur thu a sawi bawk tih a tarlang.

Heng bakah hian 4-lane highway, Kohima leh Dimapur-ah te siam a nih tur thu CM chuan a sawi a, hna chu thla rei loteah thawh ṭan a nih ang, a ti. Sorkar laipui chuan kawngpui siamna tur hian sum ṭhahnem tak a ruahman sak thu sawiin, tun aṭanga kum nga velah chuan kawngpui ṭha tak neih beisei a nih thu a sawi.