Assam sorkarin NIA puihna mamawh

Assam Forest Minister Pramila Rani Brahma chuan state sorkar ringawt chuan an state chhunga sapeltute chetna a veng seng lo tih sawiin, National Investigation Agency te puihna a mamawh niin Assembly House-ah a sawi.

Assembly Budget session neih mekah, AGP legislator Phanindra Deka zawhna chhangin, Brahma chuan state sorkar chuan samak ki hmanga sum dawnna titawp turin engtiangin nge hma a lak tih a zawt. Brahma chuan, sapeltute chuan samak an bitum ber tih sawiin, samak ki hmanga sumdawnna chu a lian tawh hle a, state sorkar chuan tih tawp tumin nasa takin bei mah se a la hlawhtling theilo a ni, a ti. Sorkar chuan an hmalakna tichak turin NIA puihna a dil tih sawiin, an ngenna chu NIA lam chuan an pawm tawh niin a sawi bawk. Samak ki tam zawk chu China leh Vietnam-ah te thawn a ni a, damdawi leh thil dangah te an hmang ṭhin a ni.

Assam-a BJP kaihhruai sorkar a din hnuah sapeltute chuan samak panga an kap leh tawh a, state Forest minister chuan sapeltute chetna do let tura theihtawp chhuah a nih tur thu a lo sawi tawh bawk. Sapelnaa inhnamhnawih mi eng emaw zat man an ni tawh a, an zingah hian park Director leh hnathawk mi eng emaw zat an tel. Hnathawktu ban leh sawnchhuah an awm nual tawh a, a bul hnaia khawsa sapelnaa inhnamhnawih man an awm nual tawh bawk. Heng zawng zawng titawp tur hian BJP MLA Padma Hazarika chuan Central Bureau of Investigation (CBI) puihna an mamawh thu a lo sawi tawh a ni. Hazarika chuan Nepal pawhin an harsatna tawh ang chu a tawk ve tih sawiin, Nepal sorkar chuan samak ki hmanga sumdawnna chu a titawp thei a ni a ti. State sorkar chuan a ṭul a nih chuan Nepal-ah palai tir mai tur leh, zirchianna neih a nih hnuah Assam-a hman ve theih te chu hman ve mai a rawt bawk.

Hetih lai hian Assam state chhunga treasury hrang hranga samak ki dah khawmte lakkhawm hna chu vawiin aṭang hian ṭan a ni dawn.

Assam-ah hian 1980 vel aṭang khan samak ki hmun hrang hrang ami te chu treasury eng emaw zatah dahkhawm a ni a, heng te hi sorkar hmalaknain hmun khatah dah khawm vek a ni dawn. Golaghat treasury-ah samak ki a tam ber a, heng zinga a tam zawk chu Kaziranga National Park ami te a ni. Rhino Horn Verification Committee, member 12 awmna chu din a ni a, Assam State Information Commissioner hlui Mohan Chandra Malakar-a'n a ho dawn a ni. Committee member zinga pali te hi wildlife expert an ni a, media mi pahnih, RTI activist pakhat, forensic scientist pakhat leh Assam Forest Department official pali an tel a ni.

Samak ki lakkhawm te hi Golaghat Circuit House-ah dah a ni dawn a, uluk taka dah leh venhim a ni ang. Venhim hna a bika din special security te chuan an thawk dawn a ni. Treasury hrang hrang aṭangin samak ki te hi lak chhuah a nih bakah khawvel ram dang dangah te thawn darh a ni a, ram ṭhenkhat chuan an Museum-ah te an dah tih hriat a ni. Hei hi hriain state sorkar chuan mumal zawka dah ṭhat a, enkawl a nih theih nan hmalakna a kalpui ta nia tarlan a ni.