Helten I-Day boycott dawn

Hmarchhak hel pawl hrang hrangte chuan August 15-a Inde­pendence Day lawmna neih tur chu an boycott dawn tih an sawi.

Hemi chungchangah hian United National Liberation Front of WESEA (UNLFW), Coordination Committee (CorCom), Manipur; Garo National Liberation Army (GNLA) leh Hynniewtrep National Liberation Council (HNLC) te chuan thuchhuah inṭawm an siam. Thuchhuah chuan hmarchhak mipui te chu India Independence Day boycott tur hian an ngen tih an sawi a, August 15 hian hel te chuan zing dar khat aṭangg tlai dar ruk thleng total shutdown an huaihawt dawn tih an tarlang..

I-Day ni hian public leh private lirthei-te chu tlan lo turin an ngen a, sumdawnna hmun leh school zawng zawng pawh khar turin an ti. Thuchhuah inṭawmah chuan, "India-in British rorelna aṭanga zalenna a hmuhna ni chu niropui t ak a ni, nimahsela hmarchhak mite tan chuan he ni hi zalenna niah pawm theih a la ni ve lo. India ram hmun hrang hrangah hmarchhak mite chuan endawng leh diriam kan la tawk reng a, thla hmasa lawka Manipur nula chunga thil thleng te kha a dikzia tilangtu a ni" tih tarlan a ni. Thla hmasa lawk khan Manipur nula pakhat chu, Seoul-a conference chhim tura a kal tur chu Delhi Rail Station-a migration officer pakhat chuan lo tikhawtlaiin, India khua leh tui a nihna ringhlel ni awm tak leh zawhna maksak tak tak a zawh avangin sawi zui a hlawh hle a, chhuichian a nih hnuah he officer hi man a ni zui bawk.

Hetih lai hian Kangleipak Communist Party (KCP)-Military Council chuan I-Day-ah hian darkar 12 awh “public curfew” an puan tur thu an sawi bawk. KCP thuchhuah chuan, curfew chu zing dar ruk aṭanga tlai dar ruk thleng kalpui a nih tur thu an tarlang a, hetih lai hian tun hnaia Manipur-a bomb puakah media leh emergency duty ten hliam an tawrh avangin bandh huaihawt tumna a awm nia sawi a ni bawk. Bomb puakah hian security force pahnih leh civil mi pathumin hliam an tuar a ni.

Manipur-ah hian Independence Day boycott tumna a awm avangin venhimna khauh tak kenkawh a ni a, hetichung hian kar kalta Nilaini khan hmun hnihah bomb a puak a, hliam zingah hian hmeichhe naupang pakhat a tel. Police-te chuan he thil thleng hi hel pawl
ṭhenkhat ten paramilitary forces te beih an tumna a nih thu an sawi. Bomb vawi khatna hi zing dar kua velah Imphal East-a Maphou Dam BSF sentry post bulah tih puah a ni a, helai bul hnaia awm hmeichhe naupang kum sarih mi chuan hliam a tuar a, Christian Hospital-ah dah luh nghal a ni. Bomb puahna hmun hi Policeleh paramilitary forces te chuan an thleng nghal a, pawikhawihtute dap chhuah hna an thawk nghal.

Hemi ni vek hian Assam Rifles convoy te chu Imphal-Moreh highway, Manipur University main gate bulah hel te chuan bomb hmangin an lo bei bawk. Bomb hi remote control hmanga tih puah a nih thu police te chuan an sawi. Manipur-ah hian thla thum kalta chhungin bomb vawi 10 a puak tawh a, mi pasarihin nunna an chan tawh a, hliam eng emaw zat an awm bawk. Imphal East district police te chuan tunlai hian Checkon area leh a chehvelah hel dap chhuah beihpui an thlak mek a ni. Helai vela cheng kum 15-50 inkar te chu ahmei apa-in hel an nih leh ni loh bakah hel te nen inzawmna an nei em tih an chhuichiang bawk.