AFSPA duh lohna kawngzawh huaihawt

Nagaland-a zirlai sang chuang zet te chuan Armed Forces (Special Powers) Act (AFSPA) duh lohna lantirin Ningani khan kawngzawh an huaihawt.

Zirlaite hi zirtirtu leh pawl hrang eng emaw zatin an ṭawiawm a, sorkar laipuiin hmarchhak Disturbed Areas Act (DAA)-ah puang a, Armed Forces (Special Powers) Act a hman mek duhlohna an auchhuah pui a ni. Kawng zawh hi Naga Students’ Federation (NSF), Naga Peoples’ Movement for Human Rights (NPMHR), Naga Mothers’ Association (NMA) leh Naga Hoho ten an buatsaih a ni a, Khuochiezie Kohima Local Ground-ah tih tawp a ni.

NSF president Subenthung Kithan chuan, "Buaina chawh chhuah kan tum lo a, pawisawi lo leh zirlai mi fel tak ten sipaite silai hmehpuah avanga nunna an chan fo hi kan duh lo a ni. Hei hian ṭhangthar lo awm leh zel turte rilru thlenga nghawng thei a ni" a ti. NPMHR Secretary General Neingulo Krome chuan,“Mipuite hian boruak rallmuang tak hnuaia awm hi kan duh ber chu a ni. Pawisawi lo thihna thleng fo hi tihtawp a hun tawh a ni" tiin, "Sorkar laipui hian AFSPA hi mi nunna laknaah a ngai lo em ni? Hei aia mihringte dikna chanvo rahbehsakna leh indiriamna hi a awm chuang lo", a ti. NMA President Abeiü Meru pawhin, "Wuzu hmuna thil thleng rap thlak tak kha kan la hre reng a, Pangsha border thil thleng pawh khan rilru a la luah reng a ni", a ti. Naga Hoho General Secretary, Mutsikhoyo Yhobu chuan kalkhawmte hmaah AFSPA hman a nih hnua harsatna hrang hrang thlengte a sawi chhuak.

Kawngzawh huaihawttute hian memorandum siamin, pawl hrang hrangin hming an ziah hnan hnuah Prime Minister Narendra Modi, Nagaland Governor PB Acharya leh Chief Minister TR Zeliang te hnenah an thehlut. Memorandum-ah hian AFSPA leh DAA hlih an phut thu leh mipuite tawrhna nasat zia an tarlang a ni.

School leh college hrang hrang 40 vel aṭangin zirlai te hi an pungkhawm a, pawl hrang hrang bakah AFSPA hlih thlawptu mi ṭhahnem tak an pungkhawm a ni. AFSPA duh lohna lan tir hian hmarchhak hmun hrang hrangah vawi eng emaw zat lungawi lohna lantir a lo ni tawh bawk. Tun hnai khan Manipur-ah Zeliganrong Students’ Union te buatsaihin Apollo Ground, Tamenglong District Headquarters-ah lungawi lohna lantir a ni. Kum 60 chuang zet chu hmarchhak mihring maktaduai 40 vel chennaah he dan hi hman a ni tawh a, hun rei tak chhung Jammu & Kashmir-ah hman a ni tawh bawk. Mi tam tak chuan AFSPA hian United Nations 'Human Rights laws' a bawhchhia niin an sawi a, UN pawh he mi chungchangah hian a ṭawng chhuak tawh a, India sorkar chuan a la ngaihthah zel thung.

Nagaland-a zirlaite kawngzawh-ah hian AFSPA slogan - ‘Repeal the AFSPA,’ ‘Indian armies leave us alone,’ ‘AFSPA – License to kill the innocent public,’ ‘AFSPA – Murder of Human Rights,’ ‘AFPSA State Sponsored Terrorism,’ tih te chu kawng zawhte hian an keng a ni. Kawngzawh hnu hian public meeting neih zui a ni bawk.