Kalikho Pul thuziak ṭhenkhat hmuchhuak

Arunachal Pradesh chief minister hlui Kalikho Pul thihna chuan thawm a la nei zui zel a, a room-ah a thuziak pali lai hmuhchhuah leh a ni a, police kutah hlan a ni.

Additional District Magistrate (ADM) Talo Potom chuan, "Heng thuziakte hi hmuh a nih veleh police hriattir nghal an ni. Lekhabu te hi phek 60 vela chhah a ni a, a bu hmingah hian 'Mere Vichaar' (My Thoughts) tih a ni a, hengte hi Pula thia an hmuhna hmun vekah hmuh a ni" a ti. A thuziak chu char ṭhat thlap a ni a, tumahin an chhiar hmain police kutah hlan a ni. Heng bakah hian mobile handset pali leh tablet pakhat chu a room-ah hian a hnutchhiah bawk a, hengte pawh hi zir chian tura tih a ni. A thihdan hi 'tualthite thih dan chhuina' Section 176 of the CrPC tlawhchhana chhui a nih thu Potom chuan a sawi bawk. Hetih lai hian sorkar lam chuan Pul-a ruang post-mortem report chu a la puang zar lo niin Principal Secretary (Home) Satya Gopal chuan a sawi.

Kalikho Pul: Carpenter aṭangin

chief minister-ah

Arunachal Pradesh chif minister hlui, Thawhlehnia a room-a thia hmuh Kalikho Pul-a'n politics a luh chilh dan leh chief minister ni tura a kawng zawh hi a thui hle.

Kalikho Pul hi July 20, 1969 khan a piang a, Indira Gandhi Government College, Tezu aṭangin a graduate. Pul hian school-ah 'chowkidar' hna a thawk ṭhin a, social service lamah a tui hle. India leh China inrina depa awm Anjaw district-a Walla thingtlang khuaah an khawsa ṭhin.

Pul hi thing mistiri (carpenter) niin, a hnuah school 'chowkidar' hna a thawh leh a, kum 1995 khan politics-ah a hun bul a ṭan a, Hayuliang constituency aṭangin MLA atan thlan tlin a ni a, Mukut Mithi hun lai khan state Finance minister nihna a chelh ṭhin. Heta ṭang hian hawi kir leh tawh loin a dinna bial Hayuliang aṭang hian a zawnin vawi nga thlan tlin zui a ni a, Power, Finance, Land Management te a enkawl ṭhin.

Kalikho Pul hi high-powered committee member atan ruat chhoh a ni a, hun rei vak lo chhung CM adviser a tan ruat a ni bawk. Kum 2006-09 chhung khan finance minister atan ruat leh a ni a, 2009-11 chhungin rural work deparment a enkawl a, he mi hnu hian health department a enkawl zui bawk. Kum 2011-14 chhungin CM adviser hna a thawk leh a, Arunachal Pradesh Congress Committee-ah kum 13 chhung executive member a nih bakah, Pradesh Election Committee Member-ah kum 7 chhung a awm leh bawk.

Congress sorkar paihthlak a nih hnuah, kum 2016 February khan Arunachal Pradesh Chief Minister atan lakluh a ni a, thla ruk chhung chief minister hna a chelh a ni. Supreme Court thupeka AP-a Congress sorkar din a nih leh hnu khan Kalikho Pul hian depression nasa tak a nei zui nia sawi a ni a, a thih hma ni 15 chhung vel khan pawn pawh a chhuak meuh lo niin an sawi. Thawhlehni zing khan hun harsat tak paltlanga Arunchal Pradesh chief minister pariatna atana lawmluh Kalikho Pul chu Chief minister residencial-a a room-ah inawkhluma hmuh a ni ta a ni. A ruang hi a pianna Anjaw district-a Walla panpui a nih hnuin sorkar chawimawina famkim nen vuiliam a ni ta a ni.