Meghalaya Police ten GNLA Camp tihchhiat sak

Meghalaya Police te chuan Nilaini khan Garo National Liberation Army (GNLA) ten South Garo Hills district-a training camp thar an siam chu an tihchhiat sak.

Camp hi GNLA chief Sohan D Shira Deep-a hmalaknaa din nia tarlan a ni a, he hmun hi an pawl zawm tharte training pekna hmun atana ruahman a ni. Sohan D Shira Deep hi alo tlanchhe hman a, Garo Hills police te chuan hel lakah beihpui an thlak nghal tih an sawi. Garo National Liberation Army (GNLA) leh United Liberation Front of Assam (ULFA) te chuan ramngaw chhah tak chhungah camp eng emaw zat an nei tih hriat a ni a, police leh military forces te chuan beihpui an thlak ve reng a, camp ṭhahnem tak tihchhiat a nih tawh bakah, hel pawl mi leh sa leh an ralthuam eng emaw zat man a ni tawh tih South Garo Hills district police chief Anand Mishra chuan a sawi.

Police te chuan tun hnaia ULFA leh GNLA te laka beihpui an thlaknaah hel eng emaw zat an kap hliam tih sawiin, an zingah hian Shira, senior commander Baichung Momin leh Baltuish te pawh an tel niin an sawi. Police ten camp an luhchhuah ṭhen-khatah chuan thisen luang hmuh tur a awm nual a ni. Police te chuan camp tam zawk chu ramri hnai East Garo Hills leh a chhehvela awm an nih thu an sawi a, ralthuam leh an document pawimawh eng emaw zat an man thu an sawi bawk.