Sharmila-i'n AAP sawmna hnawl

Aam Aadmi Party (AAP) chuan Irom Sharmila-i chu nakkuma Manipur Assembly Election-ah an party ticket-a ding turin an sawm a, party chief ministerial candidate nih tir an tum nia tarlan a ni. Mahse hei hi Sharmila chuan hnawlin Independent-a a din tur thu a sawi.

Irom Sharmila-i chuan, "Ka lo sawi tawh angin 2017 assembly election-ah hian Independent-in ka ding dawn a ni", a ti. AAP Manipur unit president Th. Manihar Singh leh party hruaitu dang pahnihte chuan Sharmila hi Jawaharlal Nehru Institute of Medical Sciences-ah hmuin darkar khat leh a chanve vel an ti ti pui a, Sharmila hnenah hian ziakin ngenna an thlen bawk.

Sharmila-i hian Thoubal assembly consti-tuency-ah chief minister Okram Ibobi Singh khing turin Independent candidate-in a ding dawn nia sawi a ni. AAP Manipur unit president Manihar chuan, "Sharmila-i hi AAP zawm tur hian ka ngen a, tunah zawm nghal lo mah se engtikah emaw chuan a thutlukna hi a la sawh sawn thei a ni. Sharmila hian a thutlukna hi telephone hmang pawhin AAP a hriattir thei renga, a chhanna kan nghak mek a ni", a ti.

Kum 2014 Lok Sabha election-ah khan AAP hian Sharmila-i hi an party hminga ding turin an lo sawm tawh a, he sawmna pawh hi a lo hnawl tawh a ni. Sharmila-i hi a hriselna ngaih pawimawh a ngaih avangin Hospital-a hun eng emaw chen a awm a la ngai dawn a, hetih lai hian Indian Red Cross Society, Manipur branch chuan a chenna tur chu Imphal city police station bula Mahatma Gandhi Avenue-ah an ruahman sak tawh thu an sawi.