Assam-a inkahna thlengah police pakhat thi

Assam police thuchhuah chuan Inrinni zinga Karbi Anglong district-a inkahna thlengah Police Battalion ami mi pakhatin nunna a chan thu leh hliam tuar pahnih an awm thu an tarlang.

Inkahna thlenna hmun hi Rongbongway police station huam chhung a ni a, Guwahati aṭanga km 250 vela hla a ni. Hnu chhui hna thawh nghal a ni a, police beitute hi tute nge an nih tir hriat a la ni lo. Hel zingah hian thi leh hliam an awm hriat a ni lo a, police lama hliam tuar pahnihte chu Guwahati Medical College and Hospital (GMCH)-ah enkawl an ni.

Hetih lai hian Independence Day chawhbuai tumin hel pawl eng emaw zat chuan hma an la mek a, Inrinni vek khan khan Lokopriya Gopinath Bordoloi Airport-ah bomb hmuh a nih thu leh a puah hmaa sut hman a nih thu Assam City police te chuan an sawi.

Mi pahnih, motorcycle-a chuangte chuan box chhungah bomb hi dahin, Lokopriya Gopinath Bordoloi Airport-ah hian an vawm lut a, a puah hmain sut hman a ni. Box chhungah hian grenade pathum awmin, he airport-a awmte chu pawikhawih tum tute hian an bitum nia a lan thu police te chuan an sawi.

Kar kalta khan ULFA-Independent helte chuan Tinsukia district-a Philobari Bahbon khuaah mi pahnih an lo kaphlum tawh a, midang parukin hliam an tuar a ni. August 5 khan Kokrajhar district-a Balajan market-a pawikhawihna avangin mi 14 an thih bakah mi dang ṭhahnem takin hliam an tuar a ni.

State sorkar chuan vawiina Independence Day lawmna turah mipuite chu fimkhur tur leh chiai lo turin an ngen a, venhimna khauh taka kalpui a nih thu an sawi. I-Day lawmnaa pawikhawihna hrang hrang thleng thei veng turin police leh para-military forces te chuan venhim hna ngawrh takin an thawk dawn tih state Parliamentary Affairs Minister Chandra Mohan Patowary chuan Assembly-ah a lo sawi tawh a ni. Patowary chuan state chhunga helte pawikhawihna avanga nunna chan te chu cheng nuai nga leh hliam tuarte chu nuai khat ṭheuh pek an nih tur thu a sawi bawk.