Chakma-Hajong Issue : Pawl aiawh ten Kiren Rijiju dawr

All Arunachal Pradesh Students’ Union (AAPSU) vigilance vice chairman Jango Halai, CLLANDT chairman Manlem Wangsu, All Tai Kampti Singpho Students Union (ATKSSU) general secretary Khamoon Mangpoon te chuan Chakma leh Hajong chungchangah Minister of State for Home Kiren Rijiju chu Inrinni khan New Delhi-a a office-ah hmalak pui tura ngenin an dawr.

Pawl hrang hrang aiawhte chuan Chakma leh Hajong refugee-te chu Changlang, Namsai leh Lohit district-ah te an pung chak hle tih sawiin, MoS hnen-ah hian an harsatna tawh hrang hrangte an sawipui a ni. Heng refugee-te hi an awmna tura sorkarin a pekah khawsa loin, hmun hrang hrangah an kal darh nia sawi a ni. Bordumsa leh Diyun sub-division-ah te chuan he hmuna lo cheng tawhsa te aiin refugee hi an tam tawh zawk a, ram ngaw leh nungcha an cherem chak hle tih tarlan a ni bawk. Chakma leh Hajong refugee-te hian tualchhung mite chungah harsatna an thlen fo a, hei hi pawl tam tak chuan an duh loh thu an lo au chhuahpui fo tawh bawk.

Pawl hrang hrang aiawhte chuan Eastern Bengal frontier Regulation Act, 1873 (Inner Line Permit) hman a ni reng chunga Chakma leh Hajong ten ILP nei loa Arunachal Pradesh an lut chu an hriatthiam loh thu leh, sorkar laipui chu hma la tura an duh thu minister hnenah hian an thlen. Minister of State for Home Kiren Rijiju hnenah hian memorundum an thehlut nghal bawk a ni.