Manipur-ah chawnghei kalpui tumtu police ten la

Imphal west district police te chuan Inrinni khan ‘Women and Crime Journal’ monthly magazine editor Arambam Robita-i chu Armed Forces (Special Powers) Act dodalna lantir a, thih thlenga chaw nghei a tum thu a puan avangin an la.

Robita-i chuan thutharmthehdarhtute hmaah AFSPA hlih a nih theih nana kum 16 chhung zet chaw lo nghei tawhtu Irom Sharmila-i hnungzuia chaw nghei kalpui a tum thu hi Zirtawpni khan a sawi.

Sharmila-i hian November 4, 2000 aṭang khan AFSPA hlih a nih theih nan chaw a nghei ṭan a, kar kalta August 9 (Thawhlehni) khan a chawnghei hi a titawp a ni.

Manipur-a NGO, hmeichhe pawl leh activist ṭhenkhat te chuan Robita-i chu fanu naupang te pahnih a pawm mek avangin chawnghei chu kalpui lo turin an ngen a, a pasal Arabam Hera pawh Robita-i thil tum thlawp lotu zingah a tel.

Robita hian Canchipur-a Manipur University kianga an office ground floor-ah chawnghei hi kalpui ṭan a tum a, mahse Imphal west district police te chuan ti lo tura ngenin an la zui a ni. Robita-i hi ziaktu lar a ni a, international leh national award eng emaw zat lo dawng tawhtu a ni. AFSPA hi Manipur-ah hian Naga hel tamna hill area-ah hman a ni a, November 8, 1980 aṭang tawh khan valley area-ah hman a lo ni tawh bawk.

Organisation for Indian Women Against Crime (OIWAC) dintu leh secretary ni bawk Arambam Robita-i hian chaw nghei a kalpui tur thu hi Zirtawpni khan Manipur Press Club-ah a puang a, Sharmila-i’n hma a lo lak tawhna te chu chhunzawm a tum thu a sawi a ni. Robita-i hi kum 32 mi niin, fanu pahnih, kum 10 mi Diamond leh kum 4 mi Tamphamani-te a nei a ni.

Hetih lai hian Red Cross ten chenna tur an ngaihtuahsak, Irom Sharmila-i chu a hriselna a ṭha vak lo niin doctor te chuan an sawi. Kum 16 chhung zet thil sakhat ei lo-a awm tawh avngin, Sharmila-i hian thil ei thei tawh mah se, a thil ei loh rei lutuk avangin a taksa insiamrem turin hun ala duh rei dawn niin an sawi.