Arunachal : APPSC question leak-a inhnamhnawih hrem leh phut

All Arunachal Pradesh Students’ Union (AAPSU) chuan APPSC question paper leak kaihhnawiha education department official-te paruk, hrem an nih hnua an hna ngaia dah let leh an ni chu duh loin, hremna pe leh ngei turin an phut tih nimin khan an sawi. Sorkar chu an thil phut ti hlawhtlin nan ni sarih hun an pe tih nimin khan an tarlang.

APPSC question paper leak kaihhnawihah hian official parukte hi manin an hna aṭangin suspend an lo ni tawh a, mahse tun hnaiah court thupek angin an hna ngaiah dah leh an ni. An zingah hian Block Education Officer (BEO) leh zirtirtute an tel.

AAPSU chuan Chief Secretary hnenah lehkha thawnin, official parukte hi suspend chhunzawm leh an phut a, an hna ngaia dah leh anni hian mipuiten an state education system chungchangah rinna an hloh phah a hlauhawm thu an tarlang. Hei bakah Education Commissioner chu heng mite laka department-in action a lak loh chhan ni sarih chhunga sawifiah tura an phut thu an tarlang bawk.

Zirlai pawl chuan question paper leak-a inhnamhnawihna nei zawng zawngte chu hrem vek an phut thu sawiin, Arunachal Pradesh ṭhalai, hna la zawng leh zel turte tana hna lakna kawnga dik tak leh langtlang taka thil kalpui a ṭul thu an sawi.

Arunachal Frontier Tribal Front (AFTF) hotu Tadak Nalo pawhin zirlai pawlte thil phut a thlawp thu sawiin, education department chu na takin a sawisel. Chief minister Pema Khandu chu eiruk dona kawnga a hma lak dante zawtin, dik lo taka titu official-te an hnaa dah let leh a ni hi CM-in khauh taka eirute chungah action lak a ni ang tia a lo intiam tawhna kalh a ni, tiin a sawi.