I-Day-ah hmarchhak hnam pasaltha mi 10 chawimawi

Sorkar laipui chuan Independence Day lawmnaah India zalenna sualtu, hmarchhak biala pasalṭha mi 10-te chawimawina a hlan. Chawimawina hlan zingah hian hmeichhia pathum an tel.

Chawimawina dawngtute hi British hun laia mite an ni hlawm. British Police ten an kahhlum pakhat Kanaklata Baruah-i (17) chu Gohpur-ah India Flag a ken laiin kahhlum a ni. Kanaklata Baruah hi Mahatma Gandhi-a'n 'Quit India Movement' a kalpui thlawptu a ni a, hmeichhe huaisena sawi ṭhin a ni. Bhogeswari leh a thurualpui Ratnamala te chu Assam-a British Police officer Captain Finish hmu tura an kalnaah police ten lo kapin hliam na tak an tuar.

Naga political leader Rani Gaidinliu chu chawi-mawina hlan zingah hian telin, kum 1930 chhoa British colonialism kalpui duh lotute zing a mi a ni. Rani Gaidinliu hi man a ni a, kum 14 zet jail a tang a, India-in independence a neih hnu, kum 1947 hnuah chhuah chauh a ni. Assam aṭanga an chawimawi Kushal Konwar chu kum 1942 khan Sarupathar-ah British miten an khaihlum a ni.

Arunachal Pradesh freedom fighter Moje Riba chu India-in Independence a sualna kawnga sulsutute zing a mi a ni a, ani pawh hi Quit India Movement tuipuitu zing a mi a ni. Chawimawina hlan zinga mi Assam Chief Minister hmasa ber Gopinath Bardoloi pawh a tel. Gopinath Bardoloi hi India-a Assam a beh theih nana nasa taka beitu a ni a, Muslim League kalpui a nih theih nana sulsutute zinga mi a ni. Khatih hun laia East Pakistan Hindu te dodaltu a ni bawk. Kum zabi 18 chhoa British-in Khasi Hills awp tuma a beih laia do lettu Khasi Tirot Sing chu Independence Day vawi 70-na lawmnaah hian chawimawi a ni bawk. Tirot Sing hi Khasi mipuite kaihruaitu ber niin, house arrest a nih hnu July 17, 1835 khan Dhaka-ah a boral.

Sorkar laipuiin hmarchhaka zalenna sualtu a chawimawi zinga pakhat chu Mizo pasalṭha hming-thang Khuangchera a ni. Pasalṭha Khuangchera hi Mizo zinga British rorelna hnuaia awm duh lo leh a taka dolettu hmasa ber a ni. Zalenna a sual kawngah hian mi hriat a hlawh hle a, mi tlawmngai leh huaisena sawi ṭhin a ni. Hun rei tak zalenna a sual hnuah ram tan a nunna hlanin British kutah a ni pawh hi a thi ve leh a ni.

Arunachal Pradesh aṭanga zalenna sualtu zinga hriat hlawh Matmur Jamoh chu chawimawi zingah a tel. A ni bakah hian British assistant political officer Noel Williamson, kum 1911-a thattu Jamoh a tel bawk. Jamoh hi man zui a ni a, Andamans-a Cellular Jail-ah dah a ni a, a thi zui nia hriat a ni. India tana zalenna sualtu zinga mi Dimasa tribal mi, Sambhudan Phonglo pawh sorkar laipui chawimawina hlan zingah hian a tel a ni.