ISIS te chetna kan do zel ang : Meghalaya CM

Meghalaya Chief Minister Dr. Mukul Sangma chuan ISIS firfiak pawl te chetna do turin sorkar laipui leh state sorkar te chuan hma an la reng niin a sawi.

Sangma chuan ISIS te chetna thleng thei do turin hian ṭanrual a ngai a, pawikhawihna lian tham a thlen lohna turin hma lak a ni, a ti. Hmarchhak chu hel tamna a nih avangin ISIS te nen hian inzawmna nei leh pawikhawihna thlen mai thei anga sawi a ni fo a, he mi do let tur hian sorkar chuan hma a lak reng vangin chiaina tur a awm lo tih a sawi.

Tun hnaia Assam-a helte chet-na avanga mi 14 an thih bakah hliam tuar eng emaw zat an awm chu pawi a tih thu sawiin, tun hnuah chuan thleng tawh lo se a duh thu a sawi bawk.

Meghalaya chu ramri depa awm a nih avangin pawikhawihna thleng thei lakah inralrin reng a ngai a, hmarchhak state dangte pawhin chu chu an hmachhawn ve mek bawk a ni tih Sangma chuan a sawi. Hel pawlte do letna kawngah state sorkar leh sorkar laipui inkarah thawhhona ṭha a awm tih sawin, mipui himna chu ngaih pawimawh ber a ni a, ti. Tun hnaiah hmarchhak chu hel pawl chetna hluarna leh hmun him lo anga sawi fo a nih chungchang sawiin, hmarchhak chu ramri hrula awm a nih avangin hel chetna leh ralthuam hmanga sumdawnna a hluar a, mahse hei hi tihtawp theih a ni a, hmalak mek a ni, a ti bawk. Meghalaya sorkar chuan an state chhungah sorkar laipui nen ṭangkawpin hel lakah beihpui an thlak a, camp eng emaw zat an tihchhiat bakah, ralthuam ṭha hnem tak an man tawh a ni.

Tun hnaiah ṭhenawm ram Bangladesh khawpui Dhaka-ah pawikhawihna thlengin, he thil thleng hi ISIS te nena inzawmna neia sawi a ni bawk. Dhaka-a pawikhawihtute hian ramri kanin hmarchhak an lut tih thawm a awm a, hei hi hriain ramriah te ngawrh zawka venhim hna thawh a ni.