Assam-a Independence Day lawmna chawhbuai a ni

Nimina Assam-a Independence Day vawi 70-na lawmna chu United Liberation Front of Assam (ULFA-Independent) helten chawk buaiin, Tinsukia district hmun hrang hrangah bomb an tipuak.

Hmarchhak hel pawl te chuan thuchhuah inṭawm siamin, Independence Day an boycott tur thu an lo sawi tawh a, mipuite chu an hmalakna thlawp turin an ngen a ni. An sawi lawk ang ngeiin nimina Independence Day lawmna chawkbuai turin Tinsukia district hmun eng emaw zatah bomb puak hmuh leh hriat tur a awm a ni. Bomb puak avang hian thi leh hliam an awm hriat a ni lo. Sivasagar area-ah bomb hi puakin, bomb puahna hmun te hi venhim hna thawktute chuan an pan nghal a, thil thlen dan kim chang an zir chiang dawn a ni.

Laipuli-a Indira Gandhi School-ah pawh bomb puakin, Tinsukia town district headquarters-ah pawh zing 7.15 AM velah bomb puak a awm niin police te chuan an sawi. Doomdooma area-a Badlabhata tea estate-ah pawh bomb vawi thum lai a puak nia tarlan a ni. Hetih lai hian August 12 zan khan Philobari area-a Bahbon thingtlang khuaah ULFA-I te chuan mi pahnih kap hlumin, mi dang parukin hliam an tuar a ni.