Meghalaya-ah security audit kalpui dawn

Meghalaya chuan an state chhunga jail zawng zawngah security audit a nei dawn a, hei hi jail aṭanga tlan chhuak an awm ṭhin leh hel pawl an zawm ṭhin avanga kalpui a nih tur thu tarlan a ni.

Report-a tarlan a nih dan chuan kum 1991-2010 chhung khan jail tang 30 zet te chu an tlan chhuak nia sawi a ni. State jail aṭanga tlan chhuah tum mi 185 man an ni bawk. State Home Minister Roshan Warjri chuan sorkar chuan security audit neih a ṭul tih hriain hma a la mek a ni, a ti. Security audit neih a nih chuan nasa takin security a tichak ang a, thil dik lo leh fel lo te haichhuah a ni thei dawn a ni, a ti. Jail aṭanga tlan chhuak te hian hel pawl - Hynniewtrep National Liberation Council, Garo National Liberation Army leh ULFA te an zawm ṭhin niin a sawi.