Meghalaya hel inpete chenna tur ruahman sak

Meghalaya sorkar chuan tun hnai thla thum chhunga state sorkar kuta inpe helte chenna tur a ruahman sak. Inrinni khan Tura district auditorium-ah homecoming ceremony buatsaih a ni a, he hunah hian sorkar kuta inpe hel 110 te chenna tur Tura-ah ruahman sak an nih thu tarlan a ni.

United A’chik Libera-tion Army (UALA) hel-pawl Chairman Novem-birth Marak chuan sorkar kuta an inpek chhan sawiin,“Mipuite tana thawk kan ni a, hei hi mi tam takin an hrethiam lo ṭhin a ni. Nimahsela NGO leh kohhrna hruaitute ngenna avangin, kan in lamleta sorkar kutah kan inpe ta a ni. Kan ṭhian dangte pawh kan hnung zui a, sorkara inpe turin kan sawm mek a ni" a ti. Kohhran hruaitute chuan Garo hills-ah boruak muanawm tak awm tir an duh a, he an duhna tihlawhtling tur hian inpumkhat a ngai niin a sawi bawk. Pastor Rev Fritting D. Sangma pawhin, remna leh muanna chu an duh ber a nih thu sawiin, NGO, kohhran leh mipuite thawhhona chu a pawimawh tih a sawi.

Meghalaya-a Garo Hills leh a chhehvel chu hel chet hluarna niin, kum thum kalta chhung khan mi 120 chuangin nunna an chan. Hel te chetna avanga nunna chan zingah hian security force eng emaw zat an tel a, hel ten an ambush leh an kahhlum te an ni. Meghalaya-ah hian Garo National Liberation Army (GNLA) leh United A’chik Liberation Army (UALA) te chu hel pawl lian zual an ni. State sorkar chuan hel pawlte nena remna thuthlung ziak turin hma a la mek a, hetih lai hian Meghalaya police te chuan sorkar laipui puihnain Garo Hills leh a chhehvelah hel dap chhuah beihpui a thlak ve reng bawk.

Sorkar kuta hel inpe zingah hian United A’chik Liberation Army (UALA) mi leh sa 60 lai an tel. State sorkar kuta hel inpe te hi – UALA, GNLA, LEAF, ASAK leh ANVC mi leh sa te an ni. Achik National Volunteer Council (ANVC) hi December 2014 khan titawp a lo ni tawh a ni. UALA Chairman Novembirth Marak chuan state sorkar chu hel inpe laka a chet danah fakawm a tih thu a sawi. Hel inpe te tan hian rehabilitation package siam sak an ni dawn a, skill training leh counseling pek thlenga hmalak tum a ni.