Patkar-i'n Sharmila lehkha thawn

Social activist aṭanga politician-a inlet ta Medha Patkar-i chuan Irom Sharmila Chanu chu lehkha thawnin, National Alliance of People’s Movements thlawp turin a sawm.

Medha Patkar-i hian Sharmila-i'n AFSPA hlih a nih theih nana kum 16 chhung zet chaw nghei a kalpui thei chu ropui a tih thu a hrilh a, a hnathawh chu India ram mai ni lo khawvel nghawng a ni, a ti. Sharmila-i'n chawnghei titawp tura thutlukna chu lawmawm a tih thu sawiin, AFSPA tihtawp a nih theih nana bei zui zel tura a duh thu Patkar chuan a sawi bawk.

Patkar-i chuan Irom Sharmila hian chakna a nei a, a huaisen bawk a ni a ti. Narmada Bachao Andolan din a nih cham vawi 31 chu Rajghat, Badwani, Madhya Pradesh-ah lawm a nih dawn a, he hun hmang tur hian Sharmila chu a sawm bawk.

Medha Patkar hi 1 December 1954 khan piangin, Indian social activist lar tak ṭhin niin, politician-ah a inlet tawh thung. Amah hi Narmada Bachao Andolan founder member a ni a, National Alliance of People’s Movements (NAPM)-ah hian National Convener a ni bawk.