AP-ah DSP kaphlum

Aruncha Pradesh-a East Kameng deputy superintendent of police (DSP) Bomto Kamdak chu Yangfo thingtlang khaw kianga, Sangrungwa camp-ah Inrinni tlai lam khan kahhlum a ni.

Seppa police station lockup aṭanga tlan chhuak, Tagiung Yangfo chuan police team te chu kapin, Kamdak hi a lu-ah kah fuh a ni a, a hliam tuar loin a thi zui a ni. Police team-ah hian constable pali leh sub-inspector pakhat a tel bawk. Inkahna thlengah hian Sei Bagang chu thi zingah a tel a, fa kum hnih mi nei Charchang Cheda Yangfo chuan hliam na tak a tuar bawk. Cheda Yangfo hi a awm hmun li-ah silaimuin a fuh a, district hospital-ah dahluh niin, Guwahati panpui leh a ni a, a dinhmun a ṭha lo hle. DIGP Tussar Taba kaihhruaina hnuaiah police-te chuan hnu chhui hna an thawk nghal.

Director general of police (DGP) S Nithianandam chuan Kamdak te hi Seppa police station-a “rape and abduction case” chhui chiang tura kal an nih thu a sawi. Kamdak hi APPS 2011 batch niin, Arunachal Pradesh sorkar pawhin chawimawina a lo hlan tawh. A ruang hi pianna hmun Basar, West Siang district pan pui a ni.

Pawikhawihtu Tagiung Yangfo hi thubuai nei lai niin, kum 2010 hnu lamah ringawt pawh a lakah hian pawngsual, kidnap leh thil dang dangah te thubuai pakua lai ziah luh a ni tawh. Tagiung bakah hian midang pahnih te chu Seppa police station lockup aṭangin June 18, 2015 khan an tlan chhuak nia tarlan a ni.