Hmarchhak tan Special Plan siam a ni - DoNER Minister

Development of North Eastern Region Minister, Dr Jitendra Singh chuan ziaka zawhna a chhannaah, hmarchhak tan scheme hrang hrangah sorkar laipui chuan Special Plan a siam sak niin Rajya Sabha-ah a tarlang.

Minister chuan hmarchhak hma-sawn-na turin sorkar laipui chuan scheme hrang hrang a duang a, chak taka bawh zui mek a ni, a ti. Hemi atan hian kum 2016-17 chhungin scheme hrang hrang kalpui nan sorkar laipui chuan vaibelchhe 33,097.02 a ruahman niin a sawi. Heng zinga vaibelchhe 2400 te hi Ministry of Development of North Eastern Region (DoNER) in a tum dawn a ni, a ti.

Non-Lapsable Central Pool of Resources (NLCPR) scheme hnuaiah hmarchhak state-te chuan proposal an siam tawh a ni. Ministry of Home Affairs chuan Border Area Development Programme (BADP) hmangin border area tih changtlunna turin fund a siam sak dawn niin a tarlang bawk. Ministry of DoNER chuan NLCPR-Central Scheme hnuaiah Akhaura-Agartala Rail Link Project atan vaibelchhe 120 a pe chhuak tawh niin Development of North Eastern Region Minister, Dr Jitendra Singh chuan a tarlang bawk.