Bihar-ah zu chhe in vangin mi 13 thi

Bihar state-ah chuan zu chhe in avangin mi 13 an thi a, midang panga-te pawh an dinhmun a ṭha lo hle.

Police-te chuan zu chhe in vanga thi leh damlote hian Gopalganj district-a Harkhua Khajurbani-ah Thawhlehni tlai khan zu an in a, an in hnu lawkah an pum nain an luak zui a, thawk lamah harsatnate an nei zui niin an sawi. Damdawi-inah hruai nghal niin, an zinga 13-te hi Thawhlehni zan khan an thi a ni. District thuneitute chuan Thawhlehni zana thi te hi zu chhe in vang ni loin, thil dang vanga thi niin an sawi thung.

Bihar state-ah hian kumin April thla aṭang khan zu khap a ni a, mahse khap a nih hnuah pawh tualchhungah a ruka zu zawrh leh siam chu khap rem theih a la ni lo. Thla li chhungin zu khapna dan palzuta puh 4,707 man an ni tawh a, police-ah complain 3,719 thehluh a ni tawh bawk.

Gopalganj district Magistrate, Rahul Kumar chuan zu chhe in vanga chhiatna thleng chungchang hi member pathum awmna team-in an chhui chiang dawn tih a sawi.

State BJP president Manghal Pandey chuan zu chhe in avanga mi 13-in nunna an chan chhanah Chief Minister Nitish Kumar chu mawhphurtuah a puh. Pandey chuan zu khapna dan hman a ni chunga tualchhunga zu siam leh zawrh a la ni reng chu sorkar hlawhchhamzia lantirna a ni, a ti. He thihna thleng hi sorkar lam thuneitute chuan thup an tum a, zu chhe in vanga thi an ni lo tia lantir tumin medical report dik lo an buatsaih mek a ni, a ti bawk.