Assam leh J-K security chungchangah high-level meeting ko

Union Home Minister Rajnath Singh chuan Thawh-lehni khan high-level meeting a ko a, Assam leh Jammu & Kashmir-ah boruak muanawm a awm theih dan tur leh security chungchang ngaihtuah a ni.

Rajnath Singh chuan Kash-mir-ah dan loa Line of Control (LoC) paltlanga lut an pung zel tih sawiin, hemi titawp tura hmalak chu thil pawimawh tak a ni, a ti. August 15-a India Independence Day lawm a nih laia Assam-a helten buaina an chhawk chhuak chu pawi a tih thu a sawi bawk. Minister chuan ram mipuite himna chu sorkar ngaih pawimawh ber a ni a, tun hnaia Assam leh J&K-a thil thleng chu pawi a ti takzet tih a sawi.

Union Home Minister chuan security official-te chu Assam leh J&K-ah te khauh zawka venhimna kengkawh turin a ngen. Assam-ah chuan Independence Day vawi 70-na lawm a nih hmain hel pawl ṭhenkhat chuan buaina chawh chhuah an tum thu leh, Independence Day chu boycott an tum thu an lo sawi tawh a ni. I-Day lawm ni hian Assam-a Charaideo leh Tinsukia district hmun hrang hrangah bomb tihpuah a ni a, thi leh hliam an awm hriat a ni lo thung. Hmarchhak hel pawl- United Liberation Front of Asom (ULFA), National Democratic Front of Bodoland (NDFB), Garo National Liberation Army (GNLA) leh hel pawl dangte chetna a hluar thar hle. August 5 khan National Democratic Front of Bodoland (Songbijit) te chuan Kokrajhar district-ah bomb tipuakin mi 14 an thih bakah hliam 20 chuang an awm bawk.

Kashmir-ah chuan July 8 khan Hizbul Mujahideen hruaitu Burhan Wani chu sipai ten kaphlumin, he thil thleng avang hian tun thlengin tualchhung buaina a la thleng chhunzawm a ni. Mipuite thunun tumin state sorkar leh sorkar laipui chuan nasa takin hma la mah se tun thlengin hmun tam takah mipui punkhawm khap a nih bakah, curfew puan a la ni reng bawk.

Rajnath Singh chuan high-level meeting hi kaihruaiin, Union Finance Minister Arun Jaitley, Defence Minister Manohar Parrikar leh National Security Agency aiawh te an tel. Anni bakah hian National Security Adviser Ajit Doval, Union Home Secretary Rajiv Mehrishi, chiefs of intelligence agencie te leh civil and security official te pawhin meeting hi an telpui a ni.