India rama state hmasawn berte zingah Assam : Sonowal

Assam Chief Minister Sarbananda Sonowal chuan an state chu 'foreigner tamna, corruption hluarna, terrorist te chet hluarna leh pollution' ṭhan chakna hmun anga sawi ni mah se India rama state ṭhang chak ber leh intodelh zingah a la tel dawn tih a sawi.

CM Sarbananda Sonowal chuan India rama state hmasawn ber te zing a mi an nih theih nan state sorkar chuan ‘sabka saath, sabka vikas’ kalpui turin ruahmanna a siam a ni, a ti. He thu hi Thawhṭanni-a Veterinary College ground, Khanapara-a I-Day lawmna hmunah a sawi chhuak a ni. CM chuan helte doletna turin 'zero tolerance' kalpui a nih tur thu a sawi bawk. Prime Minister Narendra Modi chuan Assam state sorkar policy leh hmalakna te a hriatpui bakah a thlawp tlat niin Sonowal chuan chuan a sawi. Foreigner, corruption, terrorism leh pollution te nuaibo tur hian theihtawp an chhuah mek tih sawin, a taka hna thawh chu an sorkar policy pakhat a ni, a ti. Miten an state chu remna leh muanna, hausakna leh inlungrualna awmna hmun tia an la sawi tur thu a sawi bawk.

Sonowal chuan an state mipui Barak leh Brahmaputra valley-a chengte chuan sorkar thar an thlawp ṭha tih sawiin, sorkar chu mipui sorkar a nih ang ngeiin mipuite tan rawng a bawl a ni, a ti. Zirlai, kuthna tawk leh ṭhalai hna thawh tur neilo te tan sorkar chu chawl loin a thawk a, retheihna aṭanga ding chhuak turin state sorkar chu mipui nen a thawkho tih a sawi. Assam-ah hian sorkar hnathawk mi nuai nga vel an awm tih sawiin, mipuiten an aiawh Lok Sabha, Legislative Assembly, municipal body leh panchayat-a a an thlan tlin te hian state-ah danglamna duhawm an thlen ngei ang, Chief Minister chuan a ti.

Assam sorkar hian hmasawnna rualkhai zawka kalpui turin town, city, char leh tea garden area-a cheng te thlengin hma a la a, vun rawng emaw chi leh chi inthliarna emaw hian hmasawna a tiṭhuanawp tur a ni lo tiin Sonowal chuan a sawi. Assam-ah hian National Register of Citizens (NRC) kalpui mek a ni a, kum 2017 khian zawh hman beisei a ni a, hna hi 98% vel zawh tawh a ni. Ṭhenawm ram Bangladesh aṭanga dan loa luta khawsa zui an tam avangin state sorkar chuan NRC hi uluk takin a kalpui thu CM chuan a sawi bawk. Ramri venhim kawngah chak zawka hma lak a ni a, Department of Border Areas Development pawh chak zawka hna thawk tura beisei an ni tih CM Sonowal chuan a sawi.

Hetih lai hian All Assam Students’ Union (AASU) chuan Independence Day lawmnaa Prime Minister Narendra Modi thusawiah an lawm loh thu an sawi.

AASU president Dipank Kumar Nath chuan Modi thusawiah hian Assam Accord chinfel a nih theih nana beiseiawm engmah awma an hriat loh thu leh Chief Minister Sarbananda chu dan loa an state-a lut ṭhinte tihtawp kawnga hma la chak tawk loah a puh. Dipank Kumar Nath chuan Prime Minister hian Assam Accord chungchanga mipuite beiseina chu a tihtawp sak a ni, a ti. Kum 2014-a General Election neih a nih khan Modi chuan BJP ten sorkarna an siam a nih chuan Bangladesh mi, India rama dan loa lut ṭhinte veng tur leh titawp tura hma lak a nih tur thu a lo sawi tawh niin DK Nath chuan a sawi. State Assembly election neih a nih dawn khan Prime Minister vek hian campaign-naah he thu hi a sawi leh a, mahse he an harsatna tawh hi tun thlengin sutkian a la ni lo, a ti. Mipuite chuan sorkar-ah beiseina sang tak an nei tih Nath chuan sawiin, I-Day lawm a nih khan mipuite chuan nghakhlel takin Prime Minister thusawi an ngaichang a, mahse hemi chungchang hi engmah a sawi lang lo a ni, a ti bawk.

AASU president chuan zirlai pawlte hmalaknain kum 2015 August 11&12 khan New Delhi-ah national seminar buatsaih a ni a, he hun hmanpuitu Home Minister Rajnath Singh chuan Assam Accord chinfel a nih theih nana hmalakpui a lo tiam tawh niin a sawi. Mahse tun thlengin sorkar laipui chuan hma a la lo a ni, a ti. Hei bakah hian Chief Minister Sarbananda Sonowal-a'n I-Day-a a thusawiah an harsatna chinfelna lam engmah a sawi lo niin AASU president Dipank Kumar Nath hian a sawi bawk.