Arunachal : BJP-in women reservation law hmang dawn

Arunachal Bharatiya Janata Party (BJP) chuan state assembly inthlan lo awm leh turah women reservation law an hmang dawn.

He thutlukna hi party president atana thlan thar, Kaling Moyong chuan a puang a ni.

Women reservation law hi hman a nih chuan, ram rorelna platform hrang hrangah hmeichhiate an tel thei dawn a, thutlukna siam kawngah chanvo pawimawh tak an nei thei dawn a ni.

Chief minister Pema Khandu chuan tun hnai khan seat 60 awmna state assembly inthlan, kum 2029-ah neih turah BJP chuan hmeichhe candidate 20 a siam tur thu a lo sawi tawh bawk.

President Droupadi Murmu chuan September 2023 khan, Lok Sabha leh state assembly-a hmeichhe tan seat 33% hauh sakna tur bill chu a lo pawmpui tawh a ni. Mahse he dan hi chhiarpui neih leh phawt hnu leh, Lok Sabha leh assemby constituency-te siamrem leh a nih hnua hman tur a ni.

Moyong chuan kum 2029 assembly inthlan an neih tur thlirin, hmeichhiate chu inthlan chuh tura che chhuak ngam tura cho phur turin CM Khandu-a'n a fuih thu a sawi. Hei bakah CM hian minister leh MLA nupui an nih vang ngawtin party ticket pek an ni dawn lo a, candidate ni tura tlingte ngei chauh pek an ni dawn tia a sawi thu Moyong chuan a tarlang bawk.

An state-ah hmeichhiate chu kawng hrang hrangah mi chhuanawm tak tak an awm a ni tiin, politics-ah pawh an rawn che ṭha thei hle dawn a ni, tiin state BJP president chuan a sawi. Politics leh khawtlanga hmeichiate daidanna awm thinte chu tih tawp a ni a hun tawh a ni, a ti.